Russia ram Ministry of Agriculture chuan President Vladimir Putin-an July 29 a thupek (decree) alo siam tawh angin an ram mamawh ei tur ram dang atanga an lak luhte chu Aug 6 khan Bulldozer hmangin 350 tons zet mai an chilchhe buaih buaih. Hei hi US-EU ramten Eastern Ukraine a helte sum, ralthuam leh military a tanpui vang leh Crimea a chhuh sak vanga an hremna thungrulhna a ni.
.
Hetianga President Putin thupeka ei tur lak luh tihchhiat vak hi Opposition party chuan hrethiam lovin, niminah St. Peterburg khawpuiah kawngzawh an nei. President Putin hian US leh West ram atanga an mamawh lak luh reng reng tih chhiat zel turin thipek a chhuah a, he thupek tidanglam tura duh Change.orgsiamtu Olga Savelova chuan, "Hetianga bulldozer hmanga chil chhiat kher ai chuan Eastern Ukraine ah indona vanga tlanchhia ei tur neilo pek zawk awm a ni" tiin a sawisel. Change.orgatangin mi 320,000 zetin hming ziakin Kremlin thupek chu tihdanglam an duh a ni.
.
US-EU ramten nikuma Russia an hrem khan Russia sorkar chuan US, EU, Australia, Canada leh Norway ram atanga ei tur- sa, bawnghnute, sangha, thei, cheese etc lakluh a khap ve nghal a ni.
Tunah Russia chuan US-EU lam tang ni a ngaih Albania, Montenegro, Iceland, Liechenstein, Ukraine, Georgia ram atanga ei tur lak luh khap turin black-list thar a siam. "Ha aiah ha" ( tit-for-tat) tiin, a thungrul a ni ber mai.
Olga Savelova chuan, "Indopui 2na hun laia War veteran te awmin, Leningrad (tunah St Peterburg) hual beha ei tur dan chah sak a, mi sang tam tak riltama an thi ang kha a ni. Ei tur neilo, riltam tam tak awm laia hetianga thiltih hi a fin thlak loh a ni" a ti.
.
Gusimo- Smolensk khawbulah tomoto bag leh ei tur chaw chi hrang hrang lak luh turte chu bulldozer hmanga chil pherh tir vek an ni. Smolensk hi Belarus leh Russia inrina lai a ni a, nitin trucks lian pui pui, ke 8 nei 170 te chuan Western ram atanga Russia ram ei tur lak luh an phur lut nguah nguah thin a, Greece leh Maldova ram atangin an rawn lut a ni.
.
Belgorod khuaah Ukraine atanga lak luh Cheese 10 tons leh Turkey ram atanga Peaches thei 73 tons zet bulldozer chil chhiat tir a ni bawk. Russia ramah thil man a sangchho sawt hle. US chuan Russia ram Oil & Gas multi-millionaire company Gazprom chu hrek beh zingah telin a sawi a, Russia thin a tirim zual hle a ni.