Pu C.Lalzuala, Tlangpui khua hi Mizo pa tak, sa kap thei ve zet mai leh ramvah ngaina tak a ni a. Ulhbun silai neiin, Tlangpui khua Silai nei pawl President nihna pawh kum 10 lai a lo chelh ve tawh hial a ni. Pathian thilthlawnpek thiamna (talent) ropui tak neiin, nauchhar, ruh khawih leh damlo enkawl chi hrang hrang a thiam hle a. Tlangpui Doctor tiin an ko ve hial thin a, khawchhung chang ni lo thenawm khuate pawhin an ko phar nasa ve thin hle nghe nghe a, ani’n tihngaihna a hriat tawh lohnaah chuan Doctor-te pawh an buai ve ram ram fo a ni. Thingtlang mite eizawnna pui ber lo neia eizawng ve tho a ni a, pa hlim thei leh fiamthu duh tak, kawm nuam zet a ni. Pa fiamthu duh leh ho tak taka pawt mai mai thin a ni na-in dawt erawh a sawi mai mai ngai lo thung a. Tun tuma rulhlai nupa-in a lo an ven sak chanchin pawh hi dawt ni lovin thu tak tak a ni a, ama’n min hrilh mai piah lamah an khuaa mite ngei pawhin an hriatpui thu leh an hmuhpui ngei thu min hrilh a ni.

Ramvah leh sa pel nuam ti thei tak a ni na-in, kum 2005 atang khan a lo sim ta hmiah a, a silai pawh hmang tawh lovin a license nen sawrkarah a lo surrender hial tawh a, ani leh Pu James Dokhuma chiah hi Mizoramah chuan license nei lai silai surrender chu an la ni.

Kum 2005 khan Tuilut ram chu lo a tan an nei a. Kangvar hun lai vel atangin an thlam bulah hian Rulhlai nupa, banrek tia vel tur hian bu an khuar ve tlat mai a. Mi an chukin an tina ve chuang hlei nem tiin an hnawt bik lêm lo va, a tirah chuan hmeichhe ho erawh chuan an hlau deuh hle a. Engtin maha an tih lem loh avangin hun a lo kal deuh hnu chuan chu rulhlai nupa chu an tlangnêl ta hle mai a, thlam chhungah chuan an rawn khawsa ve ta hial a. Anni chhung pawh chuan an tha enliam ve mai mai zel bawk a. Thlam namthlakahte pawh rawn chawlin, an leite chu an rawn chhuah zuk zuk thin a, an tlangnêl hle. He rulhlai nupa hi hmun dangah insawn hauh lovin a kum leh March thlaa Tawitawbawk ram lama an pem san thlengin an awm ve a ni. Pu Zuala chuan, “Chhawm zel a rem ve tawh si lo va, hetia kum khat zet tlangnêl taka kan han awmho takah chuan an ngainatawm hman viau mai,” tiin a sawi hial nghe nghe.

Hetia kumtluana rulhlai nupa an thlama an khawsa tluan ve parh mai hi a mak ang reng hle a. Ama sawi mai a ni lo, an thenawm khawvengte pawhin hei hi thu dik a nih thu min hrilh a. An chhehvela lo nei dangte pawhin an hmuh nikhua pawhin tihhlum mai tum bik lovin, “Pu Zuala rul khawi a nih hi,” tiin an tha enliam ve mai mai zel a. Chutia tumahin an tih ralkhelh tak lovah chuan anni pawh zalên leh thlamuang takin an cheng ve ta reng mai ni tur a ni. Hei hian thilsiam dangten mihringte min lo nel zia leh ngainat zia chiang takin a tilang thei awm e. Ralpui beiha kan beih loh chuan chuti maiin nungchate hian mihringte chungah pawi an khawih mai mai ngai lo va, zah an ngâi thei em em a ni tih pawh a tilang thei âwm e.

Mak angreng tak mai chu hetia an awm ve chhung hian sazu-in buh reng reng an khawih lo va, sazu hmuh tur a awm lo, “Thlamah pawh sazu ek pakhatmah kan hmu lo,” tiin a sawi. Tihnat leh hnawh bo tum lêm lova chutia an awmtir ve mai mai avang chuan chu rulhlai nupa pawh chuan nuam an ti ve a, mihringte tana malsawmna thlentu niin, sazu lakah buh leh thlai dangte vensak ve-in, vengtu sipai rinawm an ni ve ta reng mai a nih chu! Nungchate chunga ngilneihna leh lainatna neih hi malsawmna ropui tak a lo ni reng mai a ni.

Rul hi Bible-a a lo lan tirh atangin thlemtu lian leh thil tha lo lam tehkhin nana hman a nih fo avangin ralpui phiarin kan phiar deuh vek hlawm tlangpui niin a lang a. Ama’rawhchu ngun taka han chhutchian erawh chuan chuti taka han hnualsuat bik tur leh ralpui phiara han phiar bik tur awzawng a lo ni lo. Tangkaina leh pawimawhna thuk tak an lo nei reng a, mautam hun lai atan phei chuan vengtu ropui tak an lo ni reng zawk a ni. Rul hmuh tawh dek deka Setana chhinchhiahna ang hrim leh tihhlum ngei ngei tura kan ngaihna hi chu dah bo daih a hun tawh e, kan tan malsawmna thlentu an lo ni reng zawk e.