Chief Minister, Pu Lal Thanhawla'n tun hnaia Chawngte-a buaina chhuak chu Pu Nirupam Chakma kaihhruai BJP leh Pu Rasik Mohan Chakma kaihhruai, MNF-te tih niin a sawi.
Vawiina Congress Bhavan-a inkhawmah he thu hi sawiin, Pu Lal Thanhawla chuan, CADC-a contract-a thawk tur hna lak ah khan CADC hotute'n tih dik loh an nei hranpa lo niin a sawi a, kha buaina ah khan Kamalanagar College-a zirtirtu pakhat chu a phusa hle ni-a sawiin, sorkar-in a chungah hremna a lek tur thu a sawi a, police-te chuan anmahni beih tum, mipuite laka inven nan silai hmeh puah theihna dan an neih angin, van lam hawiin silai an hmetpuak niin a sawi bawk a, bungrua tih chhiat a ni chu a dem thu sawiin, khatiang thil tenawm tak kha Mizoramah a thlen tawh loh a beisei a ni a ti bawk.
Pu Lal Thanhawla chuan, a kaihruai sorkar sum enkawl thiam lo-a puh tute chu ram hnuai ațanga engmah nei lo-a lo chhuakte ni-a sawiin, tunah chuan khang mite kha an hausak tak em avangin sum enkawl an thiam hle ni-a a rin thu a sawi a, sorkar-in sum a enkawl thiam avangin sorkar chu a la mualpho lo niin a sawi bawk.
Pu Lal Thanhawla chuan, sorkar hnathawk zingah an pension hun nghahhlelh a nei nual niin a sawi a, officer lian, an hnuaia țhalai thiam zawkte hup ber a, hmasawnna hnathawh tum lo leh inthlahdah an awm ni-a sawiin, pension thuai thuai se tih a ngahhlelhawm hle a ni a ti a, tun hnai khan Fisheries Department hnathawh a en ah pawh, an sum sen ngaihtuah chuan an ti țha tawk lo niin a sawi.
Chief Minister chuan, sorkar damdawi in aia mimal damdawi in in khawl an nei țha zawkte chu thil dik a ni lo a, kum tam tak awm tawh Vety department-in ar note an awp keu tir thei chauhte chu a zahthlak hle a ni a ti bawk.
Inkhawm hi MPCC General Secretary, Pu RL Vala'n a kaihruai a, thusawitu dang, Higher & Technical Education Minister, Pu R. Romawia chuan, Zawlneite'n hmalam hun thim hmu țhin mahse, politician te chuan hma lam eng an hmu țhin niin a sawi a, thim thuah hnih ngaihtuah lo a, a eng zawnga thil thlir țhin turin party mite a chah a ni.
ZONET Chanchin Thar
7 August 2015