7 august zing dar 4 vel khan Kelkang Kohhran Biak In chhung lamtualah Darkhuang vawi sarih vuak a ni a, Darkhuang vawtu ber nia ngaih Chhingchhip khua nia insawi chuan a vuak a nih loh thu a sawi laiin, a kalpuitute chuan amah ngei a nih thu an sawi thung.
.
Bawngkawn Lunglei road-a khawsa nia insawi nula pakhat Hmingtei nia inchhal chuan Kelkang Biak Inah Dar vawi 6 vuak a tum thu social media hrang hrangah a lo ti darh chiam tawh a. Tukin zing dar 4 vel khan Hmingtei ni a insawi leh amah zuitu mi 6 te chuan Kelkang Biak In chhung lamtualah Dar hi vawi 7 an vuak hnuah hmanhmawh takin an tlan haw ta a ni. (
.
Dar an vua tih lo hretu khawtual leh mikhual thenkhatin ding tura an ngen pawhin ding duh lovin an tlantlang lui a. Kelkang kohhran hruaitute chuan kawm chian an duh avangin upa 2 leh thalai hruaitu 3 ten a hnuah an umzui a, Hmingtei inti thlenna In Champhai Rahsi Veng an va thlen chuan Hmingtei ni a insawi hi Aizawl lam panin Sumo in a lo chhuak hman tawh a, kawmchian ngei an duh vangin umzui leh nghalin, Champhai Police check gate-ah an umpha ta a, hetah hian Hmingtei inti hian Darkhuang vawtu chu amah a nih loh thu leh Lalhundiki, Chhingchhip khawchhuak a nih thu a lo sawi a, Kelkang lam atanga umzuitu te hian an kir san ta a ni.
.
Champhai atanga Kelkang thlenga amah zuitu te chuan Hmingtei inti chu Aizawl atangin mipa pakhat nen Champhai an lo thlen thu an sawi a, tukin zing dar 3 vel khan Darkhuang vaw tur hian Champhai atangin Maruti 800 leh Scooter in Kelkang an pan a, an vaiin mi 7 niin, Biak In chhung lamtualah darkhuang hi vawi 7 an vua a, hemi zawh hian Champhai lamah an let leh nghal niin an sawi. Heng mi 7 kal te hian Darkhuang hi vawi 1 theuh an vua niin an sawi bawk a ni.
.
Thudawn danin Hmingtei inti thlenna leh amah tawiawmtute hi Pawlchhuak vek niin an sawi a, Ephraim kohhran lam rawngkai vek an nih thu an sawi bawk.
.
Hemi chungchangah hian Kelkang Kohhran hruaitu Upa T Lalhipliana chuan, Kelkang kohhran lamah chuan buaina engmah a awmlo a, mahse thuthang awm danah mi tam tak tibuai thei a nih vangin Darkhuang vawtute hi kawmchian ngei tumin an um zui mai niin a sawi a, Darkhuang vawtute an kawmna atangin mipuite tan engmah chiai na tur a awmlo tih a sawi bawk.