Zofa Global Network (ZGN) leh Green Mizoram Network (GMN) buatsaih Myanmar (Burma) rama leimin leh tuilian vanga in leh lo chan leh ei tur nei lo-a mangang taka awm Zofate/Zohnahthlak tanpuina tura Aizawl khawpui chhung hmun hrang hranga “Mobile Charity Concert” neih chu August ni 7 (Zirtawpni) khan chhunzawm a ni a. He hunah hian zaithiam lar tak tak te fehchhuakin zaia mipui an awih mai bakah tanpuina tur thawhlawm an khawn a ni.
.
Nimina “Mobile Charity Concert” chhunzawmna hi Vaivakawn, Khatla Kawn, Thankthing Bazar, Zarkawt leh Israel Point-ah te neih a ni a. Heng hmunah te hian Pu PC Lalrinhlua, MSU President, Pu Lalmuanpuia Punte, ZORO leh Pu Vanlalngaia, Zofa Welfare Organization President te’n thu an sawi a ni.
.
Zaithiam lar tak tak, Rosangliana (Zorock), Zualbawihi, C. Lalengliana (Zo Elvis), Christy Zaithanchhungi,Feli Fanai, Sawmtea, Sangkimi Khiangte, Rosy Zorinpuii, Vanlalsailova, Rosy K. Remsangpuii, Zomuanpuii, Lily Varte, Vanlalhlana, Ronald Zothantluanga, Lawmi Khiangte, Henry Lalmalsawma Renthlei leh Sangtei Khuptong te an zai a ni. He “Mobile Charity Concert” hi Te-a Boitlung leh Marilyn Khawlhring te’n hneh takin an host a ni.
.
ZGN leh GMN chuan tanpuina sum thawhtute zawng zawng chungah lawmthu an sawi.
Burma ram tuilian tuar te pual-a vehbur khawnna street concert hian mipui hlut a hlawh hle a, a ni hmasa 6th August, Nilaithawhtan ringawtah khan cheng nuai hnih tling lo deuh thawhlawm an khawn khawm niin ZGN chairman Pu Sangzela Tlau chuan a sawi. Nimina an chhunzawm lehnaah pawh mipuiin thawhlawm thawh an phur hle a, Khatla kawna bawm kenga khawntu zinga mi Pi PB Lianthangpuii chuan a bawm vawi thum a khah hman thu a sawi. Thawhlawm khawn nan hian center fresh bur ruak an hmang a, zaithiam leh mi lar tak tak ten bawm hi mipui zingah an keng kual thin a ni.
.
Mizoram mupui te hian Burma rama kan unau te chhiat tawhna hi thinlung takin kan tuarpuiin theih ang anga tanpuina pek hi kan chak vek mai nia an hriat thu leh international boundary in min daidang mahse, hnam khat kan nihna anga kan lo la inthlun ngheh zia he chhiat tawhna hian a rawn tarlang chiang hle nia an hriat thu buatsaihtu te chuan an sawi hlawm a ni.