Mizoram Chief Minister Pu Lal Thanhawla chuan vawiin 6 august chhun khan tun hnai ruahtui tlak nasat vanga a bial chhung Serchhip Tuikhuah Veng a lei tlahniam leh leikhi te chu a hmunah kalin a enfiah a, Chief Minister hi Dr. BD Chakma, Fisheries Department enkawltu Minister leh Pu PC Lallawmsanga, IPS, Principal Secretary, DM&R ten tawiawmin Serchhip District bawrhsap leh khawtlang hruaitute nen hmalak dan tur an sawiho.

Chief Minister hian Serchhip Tuikhuah Venga lei chetna hmun te a fangkual a, tuna hmalak nghalna tur atan leikhikna laia tui a luh tawh loh nan leh kawngpuia tuihawk a luh thlak tawh loh nan side drain siam a, leikhikna piah chhim lam culvert ah paih turin ruahmanna a siam a, lei chetna hmun hi tlak lei hmun anih avangin him tha tawk tur chuan a hnuai lam atanga check-dam tha tawk siam a tul thu mithiam ten an sawi a, hei erawh hi chu tuna tih nghal rum rum chi anih loh avangin Chief Minister chuan DM&R Principal Secretary chu hma la nghal turin a hrilh a, hei hi bawhzui nghal niin lei chetna lai leilung leh ram awm dan uluk taka lo zir chiang a ruahmanna felfai tak siam hna hi DM&R Department-in expert team atana a hman Architect Interior Engineer Construction Pvt. Ltd. (AIEC) ten a rang thei ang berin an thawk nghal ang a, a hma thei ang berin ruahmanna an thehlut ang, Chief Minister chuan Serchhip District bawrhsap kaihhruaina hnuaiah EE, PWD, Serchhip Division in heng hmalakna te hi lo enpui turin a ti a; tha taka an thawhho a tul thu a sawi bawk a ni.