August ni 6, 2015 chhun dar 11:00 khan Aizawl Municipal Council-ah Board of Councillors Meeting neih a ni a. Regulations pahnih pawm a niin Parking area-a darkar chanve chhung motor Parking rate siam a ni.
1. AMC Board of Councillors Meeting hi C.T. Zakhuma, Chairman, AMC in a kaihruai a. Chairman chuan Report pein AMC in Property Tax a khawn tan tawh thu leh mipui pawhin chhiah tha taka an pe chu lawmawm a tih thu a sawi a ni. Vawiin BOC Meeting-ah hian Draft Aizawl Municipal Council Site Development and Slope Modification Regulations, 2015 chu pawm a niin Mizoram sorkar pawmpui tura thawn a ni dawn a. He Regulations hi hman a nih chuan in sakna tura lei lai tur te, kalkawng tur lai reng reng chuan AMC tangin phalna an lak a ngai tawh dawn a ni.
.
2. BOC Meeting chu Regulation dang Draft Aizawl Municipal Council Zonal/Ward Development Regulations, 2015 pawh an pawm a. Hei hi mipuiah hriattirna chhuah a ni ang a, mipui atanga sawiselna leh rawtna thla khat chhung hun hawn a ni ang.
3. Parking Area-a darkar chanve chhung lirthei dah te chawi tur pawh BOC Meeting hian bithliahin hetiang hi darkar chanve park te rate tur a ni ang :
Hot Zone : SUV = Rs. 10; LMV = Rs. 10; Two Wheeler = Rs. 5
Category A : LMV = Rs. 10, Two Wheeler = Rs. 5
Category B : LMV = Rs. 10, Two Wheeler = Rs. 5
Category C : LMV = Rs. 5, Two Wheeler = Rs. 5
4. BOC Meeting-ah hian Colege vengin Property Tax atana Aizawl khawpui veng hrang hrang zone an siama an awmna Zone tihdanglam an dilna erawh chu hun danga ngaihtuah turin an dah a ni.