Aizawl Bazarpui chuan an Golden Jubilee lawmnaah sawrkar an pur lo a, sum awmsa nei loin Bazarpui chhunga sumdawng association hrang hrang ten sum thawhkhawmin a senso an tum a ni.
.
Aizawl Bazarpui hian an kum 50 tlinna hi kumin July 13-18 atang khan 'Faina Hapta' hmangin jubilee lawmna hi an tan a, Bazarpui huamchhunga dawrkai ten bazar tihfai hnatlang an lo nei tawh a. July 29 khan sumdawng association member ten jubilee pual thisen pek bakah, an thih huna a mamawhte pek atan an mit an donate a. Thisen unit 54 leh mit 170 an donate a ni.
.
Golden jubilee ni tak hi August 1 a ni a, Inrinni bazar ni a nih avangin August 5-ah sawn a ni. Jubilee pual vek hian Photo Gallery siam a ni a, Bazarpui hlimthla, thlalak hlui leh tun thlenga thlalak an neih ang angte phochhuah a ni.
.
Aizawl-ah hian Bazar hmasa ber chu January 9, 1910 Inrinni-ah hawn a ni a, kum 1965 thleng Dawrpui phei/Bara Bazarah chawhmeh zawrhna bazar neih thin a ni. Tuna New Market hmun hi 1 Assam Rifles sakawr dahna hmun thin a ni a. Hei hi chei thain August 1, 1965 khan bazar atan siam a ni a, 'New Market' tia koh a ni ta a ni. Hetih laia Mizo District Council chief executive member HK Bawichhuaka chuan he bazar hi a hawng a. New Market main building awmna lai hi sakawr dahna a ni thin a, 'Foreign Lane' hi sakawrpu barrack a ni thin.
.
Nilainia Golden Jubilee lawmna pui hmanpuitu Trade & Commerce minister H Rohluna chuan New Market sadawr building sak nan NEC atanga 1st installment cheng nuai 468 hmuh a nih tawh thu a sawi. New Market building chu changkang zawka sak turin ruahmanna a kal mek niin a sawi.