Tripura hmar lama relief camp lian ber Naisingpara camp-a Tuikuk-te'n Mizoram pan an tum lo a, endik tura inlan an awm lo.
.
July ni 28 atanga August ni 5 thleng khan Naisingpara-a mite hi Mizoram atanga chhuak an nih leh nih loh endik tura thawh chhuah a ni a, mahse endik tura inlan an awm lo.
.
Camp hrang hrangah hian hmun dang atanga lut an tam ve avangin Mizoram atanga chhuak an nih leh nih loh hi endik tura rel a ni a, Naisingpara hma hian camp pali-ah inlan an lo awm lo tawh. Hazachera camp-ah endik hna hi thawh leh tur a ni.
.
"Kan hriat dan chuan mipui hian Mizoram sorkar road map siam hi tha an ti lo a, Mizoram an thlen huna an awmna tur khua atana thlante chu tuna a awm sate pawh inhmun lo ram thu-ah harsatna an tawk nasa a ni a, chung mite va belh ve leh kha an ngam lo a ni," Mizoram Bru Displaced People's Forum (MBDPF) general secretary Bruno Msha chuan a ti a, "A hun hian a zir lo bawk a. Fur khaw chhiat lai a nih bakah lonei mi kan ni a, Mizoram pan ngawt ila loneih hun a ni tawh si lo a," a ti bawk.
.
Kaskau leh Khakchangpara-ah camp hrang hrang mipuite aiawhin an thil ngiat an lo sawi chhuak tawh a, Khakchangpara-ah hian lehkha an thehlut nghe nghe. Lehkhaah chuan road map an pawm loh thu leh tun hma atanga MBDPF thil phut hrang hrang tihhlawhtlin phawt an ngiat thu te an ziak.
.
Thu dawn danin, Naisingpara-ah hian Mizoram sorkar mi tirhte'n ni tin an hnathawhna tur hmun an thutchilh ziah a, ni khatah tlangau vawi hnih zel an au thin bawk.