HMING : Dr.B. Lalremruata (B hi Bawihtlung tihna a ni)
PA HMING : B. Lalremsanga
NU HMING : Lalawmpuii Hauhnar
PIAN LEH MURNA : Salem, Lunglei
DATE OF BIRTH : 18. 6. 1988
Tun tumah hian tlangval chhuanawm tak North East huap pawha Medicine lamah chuan thiamna sang Tv. B. Lalremruata Doctor of Pharmacy, Salem, Lunglei chanchin hi kan tarlang dawn a ni. An unau hi 5 an ni a, hmeichhe 2 leh mipa 3 an ni a, ani hi a upa ber a ni.
1. A HUN HMASA LAM : A naupan lai chuan lehkha thiam thei lutuk a ni bik lova, rual pawl tawka pass ve thin a ni a, Class III-VII chu LKMS. Farm veng Lungleiah a kal a, Class IX hi Presbyterian School Farm vengah a kal thung a, GHSS Lunglei atangin Class X 2nd ah a pass a, Class XI-XII hi BHSS Serkawnah a zir.
Kum 2006 khan Class XII 2nd ah pass a, he mi kum vek hian Ripand Aizawlah B Pharm a zir chhunzawm nghal a, tha tak a a zawh hnuah JSS.University of Pharmacy Mysore University atangin Pharm-D (Doctor of Pharmacy) hi kum thum zet a beih leh hnuin Distinction ah tha taka pass-in kumin July ni 15ah khan Mysore chhuahsanin puanthuah a rawn tel haw ta a ni.
Kan sawi ang khan a naupan lai chuan ‘lehkha thiam thei’ tia sawi tur a ni lova, rual pawl tawk a pass ve mai thin a ni a, amaherawhchu College level; zirna sang zawkte a beih hnu hian vantlang chunglamah invawrhin hetiang dinhmun hi a lo thleng ta a ni. “Tunah chuan rilru pe tak a lehkha ka chhiar hi a tlangpuiin ka vawng nghal deuh zel” a ti. Hei hi zirlai mekte pawhin kan chhinchhiah a tha hlein ka hria.Han zep tel ila, thianpa Thuamtea pawhin “ Kan naupan laia, Sikul a ka zirpuite hi el phak ka nei ngai meuh lova, HSLC pawh 3rd ah ka pass ve tawk tawk a, mahse College ka kal atang erawh chuan mahni tui zawngte kan han zir a ni bawk a, nuam ti takin ka zir ta a, HSLC a ka tluk lohte khan min tluk ngai ta meuh lo”, a ti bawk. Hei hi zirlai tam tak leh nu leh pate pawhin kan hriat thar a kan hmalam hun a eng zawnga min thlirtirtu ni se ka duh hle mai.
2. ENGTIN NGE NI ZEL DAWN : Aw le, zirthiamna kawng hrang hrangah zofate’n hma kan sawn nasa hle a, hnain min daih mang loh thlengin tunah chuan Pathian malsawmna kan dawng ta mek a ni. Kan Sawrkar lam hotute pawhin thalai, zirlaite an chah ngun em em chu, “Kal khat ringawta kal lovin thiam zirna kawngah peng hrang hrang zir kan mamawh,” tih an sawi fo chu tunah hian a takin a lo hlawhtling tan mek a ni. He hna thiamna sang leh vang tak mai kan ram tana tangkai em em tur hi kan sawrkar hian engtin nge an hman tangkai ang le?
Mi ram leh State thenkhatah chuan Damlo enkawl chungchangah khawvel thiamna sang tawh takah hian nasa taka tan lain ke an pen mek a, kan ramah chuan Hmanlai atanga tun thlenga kan la kal danah chuan Doctor in min en a, damdawi min chawh a, chutiang chuan kan kal a, kan tlin tawk pawh a la ni, amaherawhchu hmun tam takah chuan Clinical Department hran awmin Doctor ten an thiamna hmangin Damlote an han en a, a natna a hmuchhuak a, chuta tang chuan damdawi lam thiam miin damdawi an lo chawh a, chutiang chuan fimkhur takin damlote enin Doctorte leh Pharmacist lamte tangrualin hma an la mek a ni.
Tunah hian Mizo thalaite eng emawzatin hetiang lam hi an zir ta sup sup mai, a lawmawm, hle a ni. Nakin lawkah chuan Pharm ‘D’ hi kan la nei thluah dawnin a lang a, heng ho zir chhuak mek leh chhuak zel turte ngaihtuah hian tangkai tak a kan lo chhawr theih nan kan sawrkar pawhin ngaihtuahna thar an neih a tul hle mai. Clinical Department hi neih ve theih a chakawmin kan ram hian thil dang zawng aia a mamawh hmasak pawh niin a lang a ni. Remruata hi tunah hian ramdangah thawk tura be mekte pawh an awm a, mahse engmah chhan fel a la nei rih lo a ni.
3. PHARM ‘D’ CHUAN ENG NGE AN THAWH DAWN ? : Doctor of Pharmacy hi kan ramah chuan kan la hmelhriat vak loh te pawh a ni awm e. Anni hi chu damdawi lam thiamna zir bingtute pawh kan ti thei awm e. Damlo a nat dana zira damdawi chawhte a ni. Heti hian han sawi zau ta i la. Kan ramah chuan Doctor te’n dam lo natna an en a, natna chungchangah chuan thiamna sang tak nei an nih avangin, an hriain a tul ang angin hma an la a, zai ngai pawh ni se an zai mai a, tin, damdawite pawh an chawh nghal mai bawk thin. Ram changkang zawkte USA, Australia, India ram hmun thenkhat etc.ahte chuan Doctor in natna hmuchhuak turin a bei a, chu natna atang chuan Pharmacist (Damdawilam thiam mi, a hrana zir bing) ten damdawi an lo chawh chauh thin a ni. Chutiang chu damlo enkawl dan tur kalhmang chu a ni. Heng laia kan hriat lar zawk Doctor kan han tihte hi chuan natna chungchang etc. nasa takin an zir a, Damdawi lam erawh chu thui tak an zir lem lova, Pharmacist hote erawh chuan natna chungchang thui tak zir lovin Damdawi chungchang nasa takin an zir thung a ni.
Kan sawi tak ang khan tunlai khawvelah chuan thiamnate a sang zel a, mi an fimkhur tawh em em a, chuvang chuan heng thiamna pawimawh tak takte tangkawp hian damlote an enkawl mek a ni. Chutiang kalhmang ang chuan kan ram ( India) pawh hian ke pen ve turin hma a la mek a, Pharm ‘D’ zirna hi kum 2008 khan bul a tan ta a ni. Hetiang hi a nih avangin kan rama mihring ngaihtuah chuan Pharm ‘D’ hi an la tam lo hle a,B. Lalremruata sawi danin “North East-ah hian zir mek eng emawzat awm mahse zir chhuak hi chu tuna ka zir chhuahpui Esther Laldinpuii Aizawl Khatla ‘S’ nen chauh hian kan la niin ka hria” a ti.
4. MIZOTE LEH DAMDAWI : Mizote hian hman atangin damdawi chungchang hi kan basa ngam hle a, eng natna pawh kan lo tawk a nih pawhin khawkhat laiah damdawi chawh mai tur hre tak tak kan lo awm zel a, thenawmpa ei ang kan ei ve mai bawk a, hei hi thil lawmawm tak a nih laiin a nihna takah chuan mihring nunna a tana hlauhawm a nih avangin damdawi lo inchawh ve ngawt hi chin tam loh a that thu Remruata hian a sawi. Damdawi lam bikah Doctorate degree hial la meuh khawpa zir pawhin a har zia leh a hlauhawmzia kan hre viai viai chauh a ni a, chuvangin risk ve ngawt zel lovin hriat loh ngam hi a him ber a ti.
5. THIL DANG : B. Lalremruata hi Mizo tlangvalah chuan hleitling tak sa inphut mawi tawk tak Feet nga leh inches kua zeta sang, hang ngaihno bei an tih aia ngo lam deuh si, zahawm tawk lek a hmeltha a ni a, ruih theih thilin a tihbuai loh a ni a, Mizoramah a awm tam loh avang leh a hun tam tak zirna avanga hmun danga a awm avangin Kohhran leh khawtlangahte a duh angin a inhmang tha thei lova, amaherawhchu Mysore a awm chhung hian Mizo Welfare ah Convener te niin Mysore mizo awm tan tangkai taka kawng tinrenga an hman thin a ni. Infiamna lamah Football a ngaina a, amah pawhin a khel ve fo thin a, tin, Music lam pawh a ngaina hle a ni.