4-8-15 zan dar 8 vel khan Jammu & Kashmir a hel pawl ni a hriat leh Rashtriya Rifles te inkahna ah Sepoy Lalramchhana (23) s/o Lalbiakhluni, Ratu chu a boral a, a ruang hi tunah hian Srinagar 92 Base Hospital ah dah mek niin, Mizoram rawn thlenpui a nih hun tur pawh hriat mai theih ala ni lo. . He thil thleng chungchangah hian inbiakpawhna that tawk loh vangin chanchin kimchang hriat mai a harsa hle a, Ratu khawtlang hruaitute leh Ratu a a chhungte ngei pawhin an inkah dan leh thil thlen dan hi kimchang takin hriat an la nei hlei theilo niin an sawi a, Ratu atanga thudawn danin Assam Regiment, Rashtriya Riffles tanglai Sepoy Lalramchhana (23) te hi midang 40 vel te nen patrolling in an kal a, an inkahna hmun tak pawh hi he thu ziahlai thleng hi chuan chiang taka hriat mai theih a nilo. . Thudawn danin patrolling a an kal hi hel pawl ni a hriat ten an rawn kap a, an inkah hun chhung hian minute 3 vel a awh ni a hriat niin, silaimu hian Sepoy Lalramchhana awm ah a fuh a, bullet proof a hak chu silaimu hian kap tlangin a awm ah silaimu 3 vel a lut nia hriat a ni. Thu chiang tak hriat hleih theih a nih loh vangin patrolling a kal sipai te hi thuang hnih a kal an nih thu leh inhmusual in anmahni leh anmahni inkap ang te a sawi te pawh a awm a, hetihlai hian Ratu a Lalramchhana chhungte chu hel pawl kut tuara boral a nih thu hriattir an ni. . He inkahna thlengah hian hliam tuar dangte pawh an awm ni a hriat niin, he chanchin ziahlai chawhma lam thleng kha chuan kimchang in hriat hleih theih nilo. . Lalramchhana hi a hmunah hian a boral nghal ni a hriat niin, he thu ziahlai thleng hian a ruang hi Srinagar a sipai damdawiin ah dah a ni a, a ruang Mizoram a rawn phurh thlen dan tur hi ngaihtuah mek a ni. . Sepoy Lalramchhana nu Lalbiakhluni’n ZAWLBUK a hrilh danin, a fapa Lalramchhana hi kum 2011 a Assam Regiment a lut niin, a nu hova khawsa an ni a, an chhungkua ah amah chauh hi mipa awmchhun niin, chhungkaw eizawngtu ber a ni a, an khua Ratu ah hian May thla khan chawlh hmangin a haw a, hei hi Mizoram a rawn haw hnuhnun ber niin, nizan dar 7 vel khan a nu hi telephone a bia in, patrolling a an chhuah tur thu a rawn hrilh a, hemi zan dar 9 velah a fapa chunga thil thleng hi an hre chhunzawm leh nghal a ni.