Aizawl Municipal Council (AMC) leh Aizawl City Bus Owners Association (ACBOA) ten vawiin August ni 3,2015 atanga Green Line Express Bus tlantir an tum chu STA lamin an remtih loh avangin thulh a ni.
Zirtawpni kalta khan State Transport Authority (STA) hi an chairman R.Hrang-tawna, Transport Secretary ni bawk pisa ah thukhawmin Green Line Bus chungchang hi an sawiho a, Bus hi tlantir hrihloh phawt nise an ti. Meeting ah hian Traffic, Transport, UD&PA leh Aizawl City Bus Owners Association te an tel a ni.
STA chairman Pu Hrangtawna chuan a mah kawmtu chanchinbu hnenah “AMC ruahmanna siam hi a tha a; mahse, Bus tlan phalna petu leh rate bithliah hi STA tih tur a ni a. Engmah in dil lo leh phalna pawh awm lova thil lo tih hi a dik lo a, chubakah bus tlanbelh tir hian traffic a tihbuai theih dawn avangin kan remti lo a ni,” a ti.
Traffic SP C.Lalthanmawia pawhin bus tlantir leh a rate bithliah te STA kut a ni chunga AMC ten phalna pawh nei lova Green Line Bus tlantir an tum chu diklo a tih thu a sawi a. Green Line Bus tlantir a nih chuan nasa takin Traffic jam a siambelh a rin thu sawiin, “Control of parking hi Traffic kutah awm se, AMC hian fee khawn chauh hi tum se traffic jam hi a ziaawm ka beisei a ni,” a ti bawk.
AMC Executive Councillor Rosiamngheta chuan an ruahmanna chu mipuite zangkhai zawkna atana ti an ni tih sawiin a tlangzo ta lo erawh pawi a tih thu a sawi.