INDIA'S FISCAL DEFICIT $ 44.9 BILLIONS
-Dr. C. Lalrampana

Sorkar laipuiin data tharlam ber a tihchhuaha tarlan a nih danin Sum lakluh (Revenue income ) zawng zawng aia hmanral (total expenditures) tam zawkna chuan April-June, 2015 thleng khan Rs. 2.87 trillions a hawlh phak a, hei hi US dollar chuan 44.9 billions lai a tling phak a ni. Hei hian kum 2015-2016 target March 2016 thlenga hisap lawk atanga chhutin 51.6 percent a thleng phak tura chhut lawk theih a ni. Kum kal ta khan target pumpui atanga chhutin sum indaihlohna hian 2014-2015 chhung khan 56..1 percent a thleng tawh bawk a, kuminah erawh 4.55 percent -in hma a sawn hret tihna a ni. (TOI).

Sorkar laipui meuh pawh hetiang khawp hian a indaih lo tih hriat a ni a, India ram state hrang hrang thawhchhuah nei mumal lo tan phei chuan sum indaihlohna hi a nasa thei hle dawn a ni tih chu thil lang tlang sa a ni.

Kan state sorkar deficit pawh hi media hrang hranga tarlan a nih tawh thin danin a tlem vak lo niin a lang. Hemi kawngah hian tuna ministry thiam loha ni puh mai chi a ni lova kum 20 kal ta atanga ministry chelhtute atang daih tawha kumtin sum indaihlohna inhnawk khawmin a nghawng chhuah a ni tih kan hriat a pawimawh hle.

Zu zawrh pawh hi kan do bur bur a, zu a tha tihna emaw, zu zawrh a tha tihna hrim hrim ni lovin kan state sum lakluh (Revenue ) awm ve chhun a nih avangin uluk takin sorkarin a ngaihtuah a, loh theih loha zawrh ngaia a hriat avangin a zuar ta niin a ngaih theih.

Zu atang chauh ni lovin kawng hrang hrang atangin kan sorkar hian sum lakluhna dap khawm vat vat se kan harsatna zualpui chu a ziawm ngei ang. Kan sum dinhmun a that loh avangin '"Red mark-ah kan awm" tih leh " k-deposit ah sum zawng zawng sorkarin a dah a, pawisa a vang development a kal thei lo" tiin ram mipuite kan phunleh nuai nuai a, sorkar kan dem vak vak a, a sutkianna tur kan dal leh bur bur bawk si a, mahni kan inhrem ni berin a lang.

Sorkar pawh hian hetiang dinhmun hial hi kan thleng tawh a nih si chuan Sorkar hnathawkte atangin officer leh IV grade-te inzat deuh put puta Professional tax la lo hian hna san dab indawtin chhenfakawm tham deuhin inlak tam hleih mai se, 6th pay kalphung lo deuh a nih pawhin tihdanglam theihna a neih tho hmel si a, hei aia rate sang hian bituk sela tun ai hian a chhenfakawm tham dawn niin a chhut theih.

Hetiang zel hian schedule tribes chu income tax awl theih ni mah ila, State Assembly -ah income tax, wealth tax etc. lak theihna tur dan siam se, dik takin hmang bawk se tun ai hian kan indaih zawk ngei ang a, kan zavaiin kan chhawr tlang zawk ngei ang.