Chhimtuipui lian chuan kam lam a pan mek laiin, nimin leh ni zan lam a ruah sur avangin lui hian len lam pan lehin, Tukin 31 july zing khawfingchat hun lai vel khan Pi Zokhumi (hmeithai) chenna in chu a chimpil a ni.

Pi zokhumi hi amah chauha awm,rualban zan lo a ni a, hmanni a tui lian khan a chenna in hnuai thleng a chim avangin a bungrua thiar chhuhsak niin nimin lam khan a in vawmlut ve leh chauha, tukin zing lam khan vanduaina hi a tawk ta a ni. He Vanduaina a thlenlai hian pi Zokhumi hi a in a a awm loh avangin,mi tlawmngaite'n a in kalhna chhu chhiain in chhung bungrua leh in chak thenkhat (in chhuat thingzai leh chartin) an la chhuak hman hram a ni.

Tui lian hian a chim leh mai theih dinhmun a ding chhungkaw hnih te pawh in thiar chhuakin Community Hall lamah awm tir lai lawk an ni.

Tui lian hian zual lam a pan zel avangin vawiin khan SDO (C) leh Sub-Divisional Magistrate, Hnahthial ni bawk Pu Kannan Gopinathan chuan Thuchhuah siamin, lui chunga kea kal kaina lei siamchawp pawh tui hian a chim tep tawh avangin he lei zawha kal kai chu tiamchin awm lovin a khap a.

Tin, Sangau leh S. Vanlaiphai lam hemi kawnga kal tur Sumo te pawh hemi kawnga kal lo tur leh Counter te pawhin ticket pechhuak rih lo turin an ngen bawk a ni.