Mizoram sorkar-in a hnuaia Corporation 3 - ZENICS, ZOHANDCO leh MAMCO chu a thiat dawn.
ZONET zawhna chhangin Finance Minister, Pu Lalsawta chuan, Mizoram sorkar sum harsatna chinfel tuma sorkar-in tan an lakna-ah ZENICS, ZOHANDCO leh MAMCO thiah hi Cabinet-in a remti niin a sawi a, kum 2011 khan heng sorkar company, Public Sector Undertaking te dinhmun hi zir chiang turin Consultancy Firm rawih a nih hnu ah, an rawtna hi sorkar-in a en a, Corporation 3 te hi thiah tha a ti a ni, a ti bawk.

Sorkar company dang, ZIDCO leh MIFCO erawh chu thiah a ni ve dawn lo a, MIFCO chu mimal kuta hlan ni se, ZIDCO chu siamthat tum ni se tih a ni a, hei hi kumin February ni 18-a Cabinet thu khawmin a pawm hnu ah, thil pawimawhte bawhzui a ni a, thla hlui ni 3-a Cabinet thu khawmin a pawm leh tawh niin a sawi.

Finance Minister chuan, ZENICS, ZOHANDCO leh MAMCO te chu thiah a nih dawn avangin heng company-a thawkte kal zel dan tur pawh sorkar-in a ngaihtuah a, thawk zui lo-a chhuah mai duh zawk an awm nual a, heng mite hi sorkar laipui tih dan entawnin Early Retirement Rules hmanga chawlh tir tum an ni a, sorkar hna la thawk zui duhte pawh DP&AR in kawng a zawn sak dawn niin a sawi.

Pu Lalsawta chuan, Mizoram sorkar sum harsatna chingfel turin theihtawp chhuah mek a nih thu a sawi nawn a, harsatna zualpui chu kum 2018 hma-a siamthat beisei a nih thu a sawi bawk.