18 march 2015 zinga Vaivakawn Khawtlang hruaitute kal khawm chuan, an veng chhunga ZIDCO in Zu dawr siam nana an senso cheng 71,004 chu rulhsak ni se an ti.
ZIDCO-in Vaiva kawna zu dawr hawn an tumnaa an senso tawh chu Vaivakawn khaw tlangin an rulh theih dawn chuan ZIDCO-in Vaivakawn-a zu zawrh loh an rem ti.
Vaivakawn khaw tlang aiawhte hian Excise Minister, Pu R. Lalzir liana an hmu a, Minister hian ZIDCO leh Vaiva kawn khawtlang inkar thil a nih thu a lo hrilh hnuah Vaivakawn khawtlang aiawhte hian ZIDCO Chairman, Pu VL Robiaka chu a pisa-ah an hmu a, Pu Ro biaka chuan zu zawrhna dawr tur cheibawl nana an lo senso tawh, Rs. 71,004 chu Vaivakawn khawtlangin an rulh theih dawn chuan an chhuah san thei tih a lo hrilh ang in, nimin khan Vaiva kawn Khawtlang chuan rulh sak an rem ti a ni.
Vaivakawn leh ZIDCO aiawhte an inbiak rih avang hian Vaivakawna ZIDCO wine shop chu khar rih a ni. MIFCO-in Chatlanga wine shop hawn an tum pawh Chaltlang North mipuiin an dodal avangin la khar rih a ni a, Chaltlang North NGO Coordination Committee hruaitute chuan, MIFCO lam hian a ruka thil tih an tum loh thu leh an inbiak fel hma chu hawn luih an tum loh thute an sawi avangin lungawi lohna lantir chu an titawp rih niin an sawi.
Millennium Centre-a MIFCO wine shop erawh chu nilengin a lun a, tlai lamah zawrh tur an neih loh avangin zu lei tum, mi 100 chuangin Warehouse atanga an lak an nghak hial a ni.