REVIVAL - QUA VADIS
Rev Chuauthuama

Mizoten harhna kan chang zing tawh a; a nghawng chhuah ţha lam a awm rualin a chhe lam pawh a awm ve zel tho, chumi avang chuan harhna lo thlen lai hi kohhran fimkhur ngaih zual lai tak hun a ni. Mizo zinga harhna in a ken tel ngei ngei chu lam hi a ni a, kum 1906 harhna aţang khan tun thlengin harhna thlenna hmun apiangah an lam nasa hle thin tih chu tlang hriat ani. Kum 1984 harhna ah khan 'back' a lar a, tun thlengin 'back' tawk hi chu an la awm ve deuh reng; khawilai laiah emaw chuan 'bingbilet' uar thar ang em em hi chu a la awm ngai lo.

Harhnain a ken tel ze lian tak pakhat chu 'Thlarau Thianghlim dah lal' avanga a lang apiang pawm duak duak tumna hi a ni, Bible-in 'Thlarau Thianghlim meuh sawisel' a tih awmzia hre uk lovin mahni chan ang pawmpui lo tu chu Thlarau Thianghlim sawiseltu-a puh mai duhna boruak a lian hle thin, harhna in a ken dang pakhat chu 'nun tlawm chapopuina' hi a ni, tunhma kum 1990 vel lai pawh khan camping chhuak te thil chin pakhat khawlaia tlawm taka bawkkhupa traffic tih jam kha an. karkalta ah pawh khan Aizawl khawpuia thil thleng chu Kulikawn-Zemabawk inkara bingbilette kawngzawh avanga traffic jam kha a ni. Khami ţuma thusawitu ţhenkhatin Biakin a inkhawm sawihnawn zawng a thu an sawi phei kha chuan an petek thui tawh zia a ti lang chiang hle. A langa paua 'tlawmna thlarau' chang siin chhungrila chungnun larh duhna hi awm thei tak a ni.

Tunlai harhna ţangkaina hi sawinep chi a ni lovang; mahse fimkhur ngaihna tur erawh tam tak a awm ve thova, chu chu hmuh hmaih luih loh a tha ang. Kelkang ah 'hmun thianghlim' siamchawp te hi entirna (symbol) mai a ni tih hriat reng a tha. Tunlai harhna ah hian mi tam takin Kelkang chauh hi thlarau pûr châwkna buhzêm awmchhun emaw tia kel phung tapchim hmu ang mai a a kal tawh pawh in tlawh nawn tlut tlut kan duh ta mai a nih chuan inbih chian a ngai ang. Khawikipa awm Pathian betuten kan awmna apiangah Pathian kan pâwl thei tih hi pawm thiam a hun hle. Huho nun Kristianna hi bawh tur a nih laiin maltlata Pathian pâwl nun neih tam hi a ţangkai tho, Isua ngei pawh kha maltlata ţawngţai ţhin a ni.

Harhna ken ze nawite pawh hi intihhmuh thil a ni thei hle, Bible-a behchhan tur awm si lo, tute thinlung emawa lo lang ang anga innghah lutuk chu a fel lo, Bible-a thil lo langte duh duha bel kawi tir lah ani hek lo. Bible-a kan hmuh Thlarau Thianghlim zia chu a nawi ve lo; ze nawi zawk a chu a changtua inchhal mihringte hi kan ni ţhin. Ramsa zia chan te pawh hi werewolf film aţanga lakchhawn a nih hmel hle, kan thil hmuh leh hriat thin te hian min kaihruai thui thei hle si a. Tunlai khawvelah media a tha tawh a; khawvel hmun danga thil thleng te pawh chawpleh chilhin kan hmu thei zel tawh a, hengte hian kan thlarau chandan thleng hian nghawng a nei a, ramsa zia te pawh hi kan kai ta ani ang em? Pathian anpuia siam mihringin hnuaihnung zawk ramsa zia put chak tlatna thlarau hi thlitfim deuh chu a ngai ang.

Pathian faka lam theite lam hi a tha e; chutih laiin kan lamdan te pawh hi a darhsarh ta hle mai, khawvel lam chi hrang hrang- Rock-n-Roll, Shakira lam, Vai lam, Khawvel Concert lam leh Karkalak zau lam, etc te thlengin Biakin ah kan senglut ta bawrh bawrh mai chu a ni a; nakin lawk ah chuan 'belly dance' leh Brazilian 'Samba' lam te pawh a tel lovang tih a sawi theih loh. Thlarau hming chhala khawvel lam chi hrang hrang kan senglut duak duak zel mai a nih chuan kohhran thianghlimna hi engtia vawn him tur nge ni ta ang? Mithenkhatin 'khuang/ keyboard chawm lam' an tih pawh hi intihhmuh thil- thlarau ai chuan a mihring hle zawk a ni. Revival inkhawmpuia Pathianni zan inkhawmban zaikhawm ze uchuak tak te kha chu Hruaina Eng channel ah tih chhuah zel chi a ni dawn em ni? Khatiang kha Presbyterian zia a ni lo.

Aizawl khawpui kohhran thenkhatah thingtlang lam aţangin 'thlarau mi' inti tute emaw an lo kal a; 'rau enge maw tak' changah an inngai a, ţhenkhatte phei chuan mitthi thlarau te pawh ko chhuakin baptisma an chan tir hial a ni awm e. Chung mite chu kohhran upate pawhin dimdawih takin an lo dawng a,kohhran upate meuh pawh hetiang inti thlarau mite lakah hian an tlawm ta zawk emaw tih turin chung mite chuan kaihbu angin an kai an kai ta mai em ni? Chung 'inti thlarau mite' chuan an ze ken chu puichhuh ngei tumin ţan an la a; kohhran mite lah thlarau chan chak ta reng renga khawsa kan nih si avangin chung mite ze ken chu kan kai ta thuaia, a ţai darh ta zel ţhin a ni.

Tunlai harhna aţang hian kawiah nge kan kal zel dawn? Kelkang harhna in a ken an sawilar ber chu 'tlawmna leh thuawihna' a ni a. Pathian thu-a tuina tak tak erawh chu a thlen rih lo niin a lang. Tlawm leh thuawihna hian Pastor te zingah 2001 Synod thu pass anga zuk leh hmuam tih loh tur kha kan zawm phah em? Nge tun thlengin kan la sehsen huam reng zawk? Tute pawh kan nitin nunah danglamna min thlen sak em? Kan hnaah kan rinawm phah sawt em? Kan hnthawh ţheuhah kan taima sawt em? He harhna hian khawilam nge min panpui dawn? Ze nawi leh nu leh dangdai apiang kan in lawmsiak mai dawn em ni? Huho zai tuina ringawtah hian kan tuiral mai ang tih a hlauhawm lo maw? Kohhran hruaitu ten engtin nge he harhna aţang hian kohhran mite hruai kan tum? Hruaitu nih aiin zuitu nih lamah kan in kal thiamsiak mai dawn em ni?

Tuna pawimawh ta ber chu Pastor te leh Kohhran Upaten ze nghet tak neih a huaisen a ţul a, Pastor te tan Pathian thu an zirthiam te hman ţangkai a hun; a nghing apiang bawh zel loh tur. Rev Thansiama ţawngkam, "Kan tuipui nge kan ţhatpui?" tih hi inzawt fo ila. Thuhriltu kan rawih dawn in anmahni uluk taka kawm hmasak a tha a; kohhran kalhmang leh inkaihhruaina te pawh kim taka hrilh vek tur a ni. Mikhual thuhriltu te thu thua lo awm ve ngawt zel loh ngam a ngai. Kohhran inhungna huang chhunga lenglo te chu rawih loh a tha zawk, Thlarau hming chhal hian kohhran hi kan kal kikiau lutuk thei tih hriat reng a pawimawh. Harhna changchawia kohhran kalphung pawhfan chiam hi nakinah sut leh uiin kan chin hlen phah mai a hlauhawm.

Thil pawimawh tak chu kohhran hian tun ang boruakah hian inhruaina tur 'principle' fel tak kan neih a ngaia; chumi kawngah chuan tlakchham lian tak kan nei si em? Pastor emaw Kohhran Upa emaw tlema duhtui fal deuh chu'rau lo' tiin ar chuka tuilo khawp dem kan hreh lo tawh a, 'A lang apiang' thlarau hnathawh a ni vek lo tih chu hmasang aţanga kohhran chanchin kal tawh ah pawh hriat theih a ni. Pastor leh Kohhran Upate zui thiam lama inpe zo tak aiin hruai thiam lama inpe zo tak kan mamawh ta zawk; mahse heihi tunlaia kan tlakchham lian tak chu a nilawi si em?
Harhna hian huho nun leh lam hulh hulh piah lamah hian nunah nghawng ţha a nei tur a ni. Harhna changchawiin hna kan thawh tlem phah lutuk ta deuh lo maw? Zirlaite thlenga lehkha zir tha hlei thei lo leka harhna chang tura kan in um zui lutuk hi sim a hun, zirlai chu a zirlai tha taka zir kha Pathianin a hunna a ni rih; Pathian ringin taima takin lehkha zir rih se a tawk, Hnathawkmi kan nih hi hre rengin hna ţhulh tam lo zawnga harhna chan thiam zir a ngai ang. Chhandamna man hi chu a to ngei mai; mahse chhandam tawh te hian kan biak Pathian leh kan rin Isua zia kaiin hnathawh tam hi kan tihtur a ni(cf. Joh 5:17). Mizote hian hunawl hi kan ngah lutuk a; hna kan thawk tam tawk lo. Chhun zan zawma harhna uma kan phili hi bansan ngam a ngai a; harhna changchawia a awlthawng tam thei ang ber a awm kan tum thin hi bansan a ngai, kan hnathawhna hmunah taima leh rinawm taka thawk turin harhna hian min thuam mawlh teh se. Ka sawi tawh ka sawi leh bawk ang - Thuhriltu ropui CH Spurgeon-a chu, "Naktukah Isua lo kal dawn se, engtinnge i lo hmuah ang?" tiin an zawt a, ani chuan, "Zingah ka thawh hun pangngaiah ka tho anga, ka dan pangngaiin tukţhuan ka ei ang a, chumi hnuah chuan hnathawk turin ka chhuak ang; ka hnathawklai ngei hi Isuan min rawn hmu se ka duh" a ti. Keini hi chuan chutiang rilru chu kan pu pha lo deuh em? Hlim chiam kan duh ber a; chumi bak kal leh zel na tur kan nei lo emaw tih tur a ni.
Hetiang hi chu harhna kawngbo a ni mai palh ang tih a hlauhawm.