11 may 2015 Thawhtan tlai dar 4 vel khan Saiha Maubawk tlangval pahnih te chu Kawlawhlui, Chhimtuipui in a finna lai ah an tla hlum a, an ruang hi an tlak ni Thawhtan zan dar 8 velah hmuh nghal a ni.
Saiha Maubawk tlangval pahnih Lalchamliana (22) s/o Zohminga leh Beiriapha (19) s/o Chhualai te hi Thawhtanni khan an khua atanga hla vaklo Kawlchaw luiah Sangha man turin an ram kal a, tlai dar 4 vel khan Kawlchaw lui, Kawlawh ti a an sawi hmun Chhimtuipuiin a finna lai velah a upa zawk Lalchamliana hi a tla palh ta hlauh mai a, a thianpa chhan a tumna lamah Beiriapha pawh hi tla zuiin, an pahnih hian an boral zui ta ni a thudawn a ni.

Thian dun pahnih tui tla ruang te hi a zan a zanin Saiha Maubawk leh khaw thenawm hnai ten an zawng nghal a, an tlak ni tlai dar 8 veah an tlakna hmun atanga hla vak loah ruang pahnih te hi hmuh an ni a, nimin zing khan Saiha damdawiinah postmortem tih a nih hnuin, nimin chawhnu dar 1 khan vuiliam an ni.
Vanduaina tawk a boral ta Lalchamliana hi Greenland School Aizawl atanga pawl 12 Science zir niin, tun tum result chhuakah khan 1st division-ah a pass nghe nghe a, chawlh hmanga an khua Maubawk a a haw chuan hetiang hian vanduaina a tawk ta a ni.

Pu Laldingngheta S/o F .Lalremsanga, kum 30 mi chu heng tuitlate phumna thlan laihnaah hian kal vein ruang an thlak zawh khan dar 2 p.m velah inah a haw a, a inbual a, ka ril a tam e mai chaw ei ang u tiin chaw chu bar hnih vel khat vel a bar ve hman ang tihin a hrawk chu na a ti ta riau mai a, a na a zual zel avangin a thova thlanfimin a bual nghal zawih zawih mai a, tui vawtin a inleih a tlem a a hahdam deuh hnu chuan a tlu zal a, a mutna an siam remsak a, a chat zui nghal ta mai a ni. Amah hi Hmeltha leh Palian Pangngai tak, mi pawisawi ngailo mi a ni a, SSA ah Zirtirtu hna thawk mekin an unau pali zinga upa ber, nupui neia fa pawh 2 nei mek a ni.