Serchhip Kawnpui Presbyterian Kohhran in an Kohhran mi, sorkar hnuaia zu zuar pahnih an thunun bakah zu zawrhna in neitute rawngbawlna an hlihsak.
Serchhip Kawnpui Presbyterian Kohhran Committee atanga thu dawn danin, June 27 Inrinni-a an Pastor, Rev. H. Lallianzara ho-a Kohhran Committee thu khawm chuan an Kohhran member, Pu James Zothanpuia, AOC Veng leh Pu F. Lalmuankima, Bazar Hnuai te chu Kohhran duh loh, zu an zawrh avangin thunun ni se an ti a, zu zawrh nana an In luahtir tu, Pu F. Lalthlamuana leh Pi Lalmuanpuii te pawh an rawngbawlna hlihsak ni se an ti a, anni hi Pu F. Lalmuankima nu leh pa te an ni a, hemi bakah hian zu zuar chhungkaw pahnih hnen ațang hian thawhlawm engmah lak loh ni se an ti bawk.
Serchhip ațanga thu dawn danin, tun thla ni 20, khan Pu F. Lalmuankima hian Bazar Hnuaia an Inah zu dawr hi a hawng țan a, ni 22 khan Pu James Zothanpuia'n P&E Veng chuan hnuai, Tlangnuam Vengah a hawng leh bawk a, Pu James Zothanpuia zu dawr hi Biak In kawt chiah a nih avangin Kohhran pawhin khar turin an ngen a, P&E Veng Branch YMA pawhin an huam chhunga zu zawrh an duh loh avangin inthiarchhuak tura ngenna lehkha an pe tawh bawk a ni.