Hachhek bial chhunga Luimawi khaw miten NLUP hnuaia Lakhuihthei an tharchhuahah an lawmzia lantir nan tukin 31 july khan Chief Minister Pu Lal Thanhawla chu a chenna bungalow-ah lakhuihthei thahnem tak an pe.

Chief Minister chuan NLUP hnuaia lakhuihthei thlangtuten an tharchhuah ah lawm nachang an hria chu Pathian duh zawng tak a ni tiin, an thilpekah a lawm hle a ni a ti a. Hetiang tharchhuah thahnem tak an neih theih nachhan chu an taimaknate, thawhrimna leh tumruhna vang a ni a ti a. NLUP hlawhtling tur hian a dawngtute ah a innghah tlat avangin, midangte entawn tlak ni zel tura tan la mar pat reng turin kuthnathawktu, Luimawi khaw mite chu a fuih a ni.

Lakhuihthei chingtuten an tharchhuahte a hralhna lamah harsatna an neih thu Chief Minister chu hrilhin, Chief Minister chuan kawng dappui a tul thu a sawi a. An chinna hmun atanga awlsam zawka an thiar chhuah zung zung theihna turin link road siam dan tur ngaihtuah a ni ang a ti.

Hachhek bial chhungah hian NLUP hnuaiah lakhuihthei thlangtu mi 39 an awm a.A thente chu kum 2010 a phun tawhte an ni a.Kum 2013 atanga kumin thleng a chawhrualin mimal tinin kumtin 9000 thar ang a chhut a ni a. A hralhna lamah harsatna an neih avangin pakhat zel hi Rs.15/- a hralh ang an ni.

Kuthnathawktute hi Mamit District Horticulture Officer leh Luimawi Ex VCP Pu K.Lalthanliana ten an rawn tawiawm a ni.