July 18 (Inrinni) chawhma dar 11 vela Tuivawl luia chesual Lalthuampuia kum 35 Hliappui khua a mi ruang zawn hna chu Mizo dan anga ni 7 neih a nih hnu pawh a , hmuh a la nih loh avangin vawiin July 24, 2015 chawhnu dar 2 vel khan a tlak tanna bul lei ah vuina/thlahna hun neih a nih hnuin , a nawlpui a zawn hna tih tawp a ni.

Thuama leh a thiante chu Tuivawl kam, Champhai kai atanga lui hnar lam KM 1 velah hlo thloin ram an riak a. ni 18/7/15 zingkar-a hlo thlo an bung zo tukthuan ei tura thlam lam an pan chu a thianpa chuan lui chu daikai mai chi niin a hre lova, kai awlsam deuh laia hel mai a rawt a. E Thuama chuan 'hel ai chuan ka hleuh kai mai teh ang' a ti a, a han hleuh chu lui tui lian chuan a la ta a ni.

E Thuama ruang hi theihtawp chhuahin Keifang, Rulchawm, Ruallung, Mualpheng, Lenchim, Hliappui, Dulte, Kawlkulh, Saichal, Tualbung, Dilkhan, Saitual VC 1, 2 leh 3, Changzawl, Sihfa, North Lungpher, Phullen, Tualbung, Buhban leh Thanglailung atang tein mi tlawmngaite'n zawn hna an thawh mai bak ah ni 22 july Wednesday khan Sairang YMA President Pi Teresa hovin Sarang tuithiam mi 6 te chu ruang zawng tur hian rubber tube engemaw zat leh thing lawngleng engine nei nen an thawk chhuak ve bawk a ni.

Khaw hrang hrang a miten theihtawp chhuah a ni 7 an zawn hnu pawh a, ruang hi zawn hmuh ala nih loh avangin , Mizo Dan angin vawiin khan atlaktanna bul leiah thlahna/vuina hun neih a niin , khawtlang huap/a nawlpuia zawnhna chu tihtawp a ni.

Thlahna/vuina hunah hian Keifang joint YMA president Te, Hliappui Branch Yma president , Sairang Yma president , Zualtea (Thuama u) leh pu Zira Home minister ten thusawina hun neiin , keifang bialtu pastor Rev F.Lalchhuanawma'n malsawmna tawngtaina hun a hmang a ni.

Mizo Dan anga khawtlang huap zawnhna tihtawp anih lai hian an chhungkhat laina leh mi tlawmngai eng emaw zat chuan ruang zawn hna hi an la chhunzawm zel.