Mizoram sorkar thupek anga sikul kum thar 2015-2016 atana zirna in kai hun sawn hma duh loin, nimin khan Mizo Students' Union Hqrs, Tlabung chuan khawchhunga zirlaite sikul kal tur dan a tum a; nimahsela zirlai zingah sikul kal tum lui an awm loh avangin dan buai tur an awm lo.
Tlabung atanga thudawn danin nimin zing dar 7 atang khan Tlabung veng hrang hranga zirna in tinah duty tura ruatte an indah vek a; Tlabung khawchhunga sorkar, kohhran leh mimal enkawl zirna ina naupangte zingah school pana kal zirlai hmuh tur an awm mang lo.
Sikul kal tura thawkchhuak thenkhat pawh khaw thenawm atanga rawn kal zirlai thenkhat, MSU, Hqrs Tlabung hmalakna hre pha ve chiah lote an ni.
Heti taka inep leh innawr hah buai ngai loa Tlabunga zirlaite'n an hmalakna an thlawp chu MSU Hqrs Tlabung chuan lawmawm a ti takzet a ni.
Chutihrualin, sikul kai hun sawn hma chungchangah zirlai nu leh pate'n an ngaihdan dik tak an lan chhuahtir niin a ngai bawk a ni.
Sikul kai hunbi thliah tharin a chhe zawnga a nghawng tur chhungkuate tan Mizo students' Union, Headquarters Tlabung chu a ding tlat dawn a, mi tlem te tinzawn chung leh thlirna zim tak nena ruahmanna hi a tawp thlengin a do zel dawn tiin thuchhuah an siam.