MPSC Secretary Tamlal Lohar chuan thuchhuah siamin, Pu Andrew Lalherliana chu kum 2003 MLA inthlan khan a thian te’n MLA nomination form an fill up sakah 7th October, 1951 tia an lo thehluh tawh chu ti danglam lo vin, 2008 thleng a put thu leh, 2008/2009 a Assembly House Identity Card a siam that tirnaah chuan tih dik tirin, vawiin thlengin 7th. October, 1953 tih a hman thu a tarlang.


MPSC chairman pian kum chu a hmâ zawngin a dik a, tih dik loh palh anih kum chu 2003 MLA General Election atanga lo intan angin MPSC Office hian thu a chhuaha, hei hi dawt muhlum a ni. Mizoram Legislative Assembly Library ngei pawha la vawn that, FIRST MIZORAM STATE LEGISLATIVE ASSEMBLY, WHO’S WHO - 1988-a Legislative Assembly Secretariat Aizawl-in kum 27 kalta-a a buatsaihah pawh - “MR. ANDREW LALHERLIANA was born on the 7th. October, 1951 at Aizawl Civil Hospital...” tih a chuang kuau va. Hetih rual hian - MIZORAM : WHO’S WHO 1993’ ah ngei pawh - “LALHERLIANA ANDREW : Ambassador Pu K.C. Lalvunga fapa 2-na niin October ni 7, 1951-ah a piang a...” tih an lo ziak daih tawh bawk niin an tarlang.


MPSC Chairman atana Congress Sorkarin Andrew Lalherliana a ruat hi kum lamin a chal delh (62 yrs over) pension-a chhuah hun daih tawh, kum 64 mi niin, he Chairman hna zahawm tak hi chelh thei dinhmunah a ding tawh lo tih MNF chuan Mizo mipui hriatah an puang duh tih sawiin, kum 2008/2009 hian a kum ti naupang chawpin Ex-MLA I.D Card hi a awrh thin ni zawkin a lang niin an tarlang bawk.


Hetih rual hian Congress Sorkarin ‘Zu zawrh’ a kalpui avanga kohhran hliam nasa ber, Presbyterian kohhran tuamdam nan, remchanglo fahrana Pastor/Reverend tanglai ngei MPSC Member atana zâwl thluk theih an tum ta mai hian, congress party politics bawlhhlawh zia a ngemnghet nia sawiin, Hetianga Mipui leh Kohhran, NGO te’n Congress sorkar an ep-ut na karah hi chuan, Sakhaw puithiamte paw’n sawmna na zawng pawm dan chin tawk an thiam theih hi MNF chuan a la ring fan a ni an ti bawk.


MPSC Member atan Sakhaw puithiamte ruat duhna thinlung pu ngai hauh lo te’n, an duh thar ta thut hian engkim a ti chiang a. Hmanhmawh taka an Zu zawrh; inphenna Phaw/Kâwr atana Pathian rawng chauh bawl tura inserh hrang tura nemngheh (ordained) Reverend/Pastor te an zawng duh ta mai hi, Chinghne Beram vun sin chunga Sakhaw Puithiamte seh tumna a ni takzet niin MNF chuan an ngai a


Sorkar hian a kut ngeiin ‘Zu’ a zuar a, An Chhêk-Inpui (warehouse) lama supply-tu leh Zu zawrh zar zova hlâwkna tel tam fâl ber tur chu Lalchhungkaw Family an ni a. Hetianga Zu zawrh an duh luata leiah MPSC thleng thlenga an pal pawr ta vel mai mai hi MNF chuan pawi an ti a, MPSC Chairman atana Pu Andrew Lalherliana leh Member atana Sakhaw Rawngbawltu, Puithiam Serhhran ruat tur hi a bul atanga thlir nawnin, mipui pawm tlan theih tur ngai pawimawha rilru fim pu turin MNF chuan Congress Sorkar a ngen a. Rorelna dik chu Lui angin luang se la, titu ten MPSC an kalpui danah eng chenin nge Dikna Luipui chu an luan tir dawn,? tih Mizo mipui te’n an ngaihven reng tih hre turin Pu Lal Thanhawla Sawrkar hi MNF chuan a hriattir a ni tiin an thuchhuah ah chuan an tarlang.