MPCC Media Department chuan Mizoram sorkarin Mizoram Public Service Commission member ni tura Presbyterian Kohhran ami Rev. Zosangliana Colney a ruat chu hmun hrang hrang atang leh a Reverend pui ngei atangtein sawiselna a ri a. Kohhran hruaitute chu sorkarah an inrawlh tur a ni lo ti lam hawiin sawiselna hi a ri ber a. Hei hi tunhma chanchinte kan hriat tam loh vang a ni an ti.

MPCC media department thuchhuah chuan tunhma chuan sorkar leh Kohhran hi inngeih takin an lo thawk ho tawh thin a. British sorkar atanga India a indan khan 1948-ah Mizoramah Politics Advisory Council din a ni a. Heta member tur atan hian Pastor tanglai pahnih, Chalrang Pastor Pu Pasena leh Mizo Pastor hmasa ber Pu Chhuahkhamate chu thlan tlin an lo ni tawh a ni.

Mizoramin District Council a neih khan District Council Sub-Court-a thawk tur, Mizo Customary Laws hriate zawn an ni leh a. Sub-District Council Court, Lunglei ami enkawl turin Pastor tanglai Rev. Challiana, Baptist Kohhran ami leh Aizawl Sub-District Council Court enkawl turin Baptist Kohhran ami tho Rev. Khuangliana te chu ruat an ni a. District Council hian chinchang hria an mamawh avangin Revenue Officer atan Presbyterian Kohhran Pastor Rev. Siamhnuna chu ruat a ni bawk a ni. 1969 khan Pastor tanglai Rev. Zairema pawh khan MP a lo chuh tawh bawk a ni.

Mi thenkhatin Kohhran hruaitute sorkar hnaa an inrawlh hi thil tih ngailoh nia an sawi hi thil hriatchian loh vang niin a lang a. Sorkar tha taka a kal theihna tur a nih phawt chuan Kohhran hruaitute hi sorkarah an inrawlh hreh lo a ni tih District Council hunlaia thil thlengah hian a chiang hle. Zu chungchang a ni emaw, Kohhran hruaitute sorkara an tel vena chungchang a ni emaw, mipui rilru a dik lo zawnga hruaikawi tum tlat Mizo palar zinga an awm thin phei hi chu a vanduaithlak tak zetin a hria a. Mizoram tana Mizoram sorkara hna pawimawh tak tak lo chelh te kha an thih ni thlengin Reverend an nihna kha hlih sak an ni lova, hlihsak a hnekin Mizo mipui leh Mizorama Kohhrante chuan tun thlenga kan mi chhuanvawrte an la ni zawk a ni tiin an tarlang.