Feb 24 atanga Central Young Lai Association huaihawta Lawngtlai district pumhuapa tiamchin awmlova total bandh neih chu tun Zirtawp zan thleng khan khawng taka neih a nih hnuah, sorkar lam atanga thu lawmawm leh bandh neih chhan tihhlawhtlin a ni dawn ni a a lan avangin bandh hi tihtawp a ni.

Kan thudawnna in a sawidanin, CYLA te bandh neih chhan, Lawngtlaia P&E sub-division, division puitling dah leh Lunglei - Lawngtlai inkar kawngpui, NH 54, thangkhat lian zet siam tawhloh chungchangah, sorkar thuneitute lam atangin tih hlawhtlin mai tur anih thu leh Lunglei - Lawngtlai inkar kawngpui phei chu nimim lam khan hna tanna (hawnna) neih niin, he huna hian CYLA hruaitute pawh an tel nghe nghe. P&E sub division, Lawngtlai, division puitling hlankai ngiat chungchangah hian ruahmanna awm sa leh tihpuitlin mai tur, lehkha pawimawh te kal lai mek niin, sorkar thuneitute lam atangin thu lamawm tak dawn a ni a, ziak emaw, lehkha emaw a inhriattirna awm mai rihlo mahse hei pawh hi tih hlawhtlin nia ngaih nghal theih niin kan thudawnna chuan a sawi.

Tin, bandh neih chhan dang, World Bank sum hmanga Lawngtlai by-pass road, kaltir tum chungchangah chuan tun maia helaia tihfel vek theihloh chin a awm avangin hun ala duh deuh dawn a, allignment te ena hmalak chhunzawm angaih dawn avangin hei erawh hi chu nghah deuh ala ngai dawn niin kan thudawnna chuan a sawi bawk. Heng an thil nawr hlawhtlinna leh a taka a chan chhunzawm theihna atan hian CYLA chuan theihtawp chhuah chhunzawm zel a, kawng siamtute pawh a tul dan ang zela vil chhunzawm zel an tum thu an sawi bakah kawngpui siam hnathawktu company te pawh uluk tak leh a chak thei angbera hna thawk turin an ngen bawk niin kan thudawnna chuan a sawi. CYLA chuan bandh neih chhung zawnga Lawngtlai district mipuiten harsatna hrang hrang karah, district tana thiltha duh avanga the tak leh chhel taka tuar a an thlawpna leh tawiawmna ah lawmthu an sawi a, tin, Lawngtlai district-a pawl hrang hrang te leh Kohhran hrang hrang te'na an thlawpna leh thawhpuina-ah lawmthu an sawi bawk.