Chief minister Lal Thanhawla chuan kum 2012-a Mizorama Pawan Hans helicopter a service tan atanga tun thlengin helicopter ṭum 15 a hmang (hire) tawh a, tum khat dang mi pangngaite zingah ticket lain a zin. Helicopter atana CM sum hman zat hi ticket dang man nen a hlawma pek a nih vangin hriat theih a ni lo.

CM Lal Thanhawla'n helicopter hire-a tum 15 a zinnate chu -
Aizawl-Vanghmun,
Aizawl- Chawngte,
Aizawl-Saiha,
Aizawl-Mamit,
Aizawl- Lunglei,
Aizawl-Kolasib,
Aizawl-Lunglei,
Aizawl- Haflong,
Aizawl-Mamit,
Aizawl-Champhai,
Aizawl- Shillong,
Aizawl-Guwahati,
Aizawl-Mimbung,
Aizawl- Champhai,
Aizawl-Mimbung te a ni.

Helicopter hmanna man hi hire a nih chuan darkar khatah Rs. 70,000 a ni a, darkar khat an hmang tling lo a nih chuan an hman zat minute a zirin pawisa an chawi thin. Vawi 15 helicopter a hire bakah, tum khat Aizawl atanga Lawngtlai a zin tumin khualzin pangngaite angin ticket a la a, chuta a chuan man chu Rs. 3,300 a ni.

Mizoramah August 14, 2012 atangin helicopter a service tan a, Chief Minister leh Governor ten helicopter an hire-na sum chu passenger-te hmanna sum nen a hlawmin sorkarin Pawan Hans company-ah a pe thin a, hei vang hian CM zinna senso zat hriat a harsa niin an sawi. Lal Thanhawla'n helicopter a hman hian hmun thenkhatah chuan a kal lam leh a haw lam an hruai cháng a awm a, kal lam leh haw lama a hman loh cháng a awm bawk. Shillong leh Mimbunga a kal hian a kal lam leh haw lamah helicopter a hmang ve vea thu dawn a ni.

GAD-a Civil Aviation Wing chuan tun hnai khan Mualpuia helicopter tumna tur hmun (helipad) siamna atan PWD- ah cheng nuai 50 an pe a, PWD lamin tumhmun an siam dawn a ni. Mualpuia helicopter an riahtir hian Thuampuia sipai helipad-a zan riahtir lai aiin chêt vel a awlsam a, zan riah man pawisa chawi a awm ve lo bawk tih an sawi.

Helicopter hi Aizawl atangin khaw 10 - Saiha, Lawngtlai, Chmaphai, Khawzawl, Lunglei, Chawngte, Hnahthial, Serchhip, Kolasib, Mamit leh Ngopa-ahte a service mek a; North Vanlaiphai leh Saitualin a khuaa helicopter service an dil mek : vanglaini