Vawiin, February ni 27, 2015 tlai dar 4-a Mizo Students' Union (MSU) General Headquarters hruaitute leh Aizawl khawpui chhunga college hrang hrang hruaitute chuan MSU Office-ah scholarship chungchangah meeting an nei a, kar leh thawhtanni, March ni 2,2015- ah khian Aizawl khawpui chhunga zirlai zawng zawngte'n kawng zawh ni se an ti.

Vawiin meeting chuan zirlaite'n Post-Matric Tribal Scholarship an dawn tura sawrkarin 10% a tum ve tur a pe chhuak lo tur chu pawi a ti hle a, kum hmasalama sawrkarin minorities etc.-a state matching share 15% a pe chhuak lo fo tawh chu a ngaihtuahin, tuna state matching share 10% pek chhuah nghal a duh takzet a; zirlaite'n an chanvo tur diktak 100% la lova 90% chauh a la tur chu tha a ti lo va, zirlaite'n an chanvo tur diktak an hmuh theih nan kawngzawh a relthlu ta a ni.

Kawngzawh turte hi thuang hniha kalin, Aizawl chhim lam college — Govt. Hrangbana College, Govt.J. Thankima College, Govt. Aizawl North College, Govt. Zirtiri Residential Science College, Govt. AizawlWest College, Govt. Aizawl Law College leh Woman Polytechnic zirlaite'n Chanmari kâwn atangin kawng an zawh tan ang a;
Aizawl chhim lam college — Govt. Aizawl College, Pachhunga University College, Govt. T. Romana College leh Govt. Johnson College zirlaite chuan Sikulpuikawn atangin an zawh tan ang. Kawngzawh hi dar 10:30-ah tan a ni ang a, Vanapa Hall kawtah an intawkkhawm dawn a ni.