ZNP president Lalduhoma chuan, MNF-te'n total bandh an siam chu mipui thlavang hauhna tak tak rilru púa tih a nih chuan tha a tih thu a sawi a;
MPC vice president Vanlalhlana chuan bandh siam chu a âwm lohna a hriat loh thu a sawi thung.
Vanglaini palai zawhna chhangin Lalduhoma chuan, "MNF-te rilru kan hre lo a, total bandh an siam hi mipui thlavâng hauhna tak tak rilru púa ti an nih chuan tha ka ti. Mahse, politics-a hamthatna duh vang leh mahni intihlâr duhna rilru púa tih a nih chuan a tha lo khawp ang," a ti.
ZNP president chuan, MNF-in an sorkar laiin chhiah, tui bill, electric bill leh thil dangte an tihsan avangin ZNP-in total bandh an siam tawh tih sawiin, "An thil phût hi âwm lo pawh kan ti lo a, mahse thil man la tisang lo political party ni se a awm leh zual ang. MNF leh Congress hi chu duh inang, duh loh pawh inang an ni," a ti a; ZNP chu total bandh siam âwm ber an nih thu a sawi.
Vanglaini palai zawhna chhangin Vanlalhlana chuan, "Mipuiin harsatna an tâwk a, chumi vanga sorkar duhkhawp lohna lantirna atana MNF-in total bandh an huaihawt hi a âwm lohna ka hre lo," a ti.
Design by ZoBlog
Copyright : 2015-2100 ©
Powered by ZoBlog