14th Finance Commission rawtna Sorkar laipuiin a pawm takah State 11 te sum indaih lohna khaichhuak turin sorkar laipui chuan sorkar kumthar 2015-16 atan cheng vbch 48,906 a ruahman a, hetah hian Mizoram chan tur cheng vbch 2139 telh a ni.

14th Finance Commission Report chu nimin khan Lok Sabha rorel inkhawmah Finance Minister Arun Jaitley chuan a pharh a, Report atanga a lan danin State 11 te sum indaih lohna khaichhuak tur hian sorkar laipui chuan kum 5 chhung tanpuina pek a remti a, sorkar kumthar 2015-16 lo awm turah Mizoram chu vbch 2139 pek tura ruahman niin, 2016-17- ah cheng vbch 2294, 2017-18-ah cheng vbch 2446, 2018-19-ah cheng vbch 2588 leh 2019-20-ah cheng vbch 2716, a vaiin cheng vbch 12183 ruahman a ni.

Prime Minister Narendra Modi chuan nimin khan State hrang hrang Chief Minister te hnenah lehkha thawnin Sorkar laipui chuan 14th Finance Commission rawtna te chu lawm takin a pawm tih a hriattir a, State sorkar ten hmasawnna tura ruahmanna an siam kawngah zalenna sang thei ang ber an neih theih nan sorkar laipui chuan an kutah sum tam thei ang ber pek a duh tih a sawi a, 14th Finance Commission rawtna angin chhiah tlingkhawm atanga za a 32 state sorkar hnena pek thin chu za a 42 ah tih pun a ni tawh dawn a ni.