February ni 18 khan Pu Lalnunthara S/o Lalthangfala (L) chu Thawhah vangin Aizawl-ah a boral a. A ruang hi a Ni, Pi Remveli chuan Lungdaiah a la a, a tuk Feb. 19-a vuitur a ni.
A ruang leh vui hun nang tur hian Kawrthah atangin A nu, Pi Parvuli leh chhungkhat lainate SUMO hire in Lungdaiah chuan an kal a. Kolasib Diakkawn atanga Silchar Rd-a Hotel-pakhatah Feb ni 8 zan hian chaw an ei a. Arsa, Vawksa leh Bawkbawn leh thildang Bai pawlh bakah Bete Hâng chhum an hmeh a ni. An chaw ei zan hi chuan an la insawisel em em lo.

Feb. 19 zingkar atangin he hotel pakhata chaw ei ho, Sumo pakhata chuang ho zawng chu an Pum te nain, thenkhat phei chu an khua a sik nasa hle a, an tlun nghal bawk. An kua a thalovin an luak bawk a. Mitthi vui hunserh chhûng pawhin an insum hlei thei hlawm lova, Mitthi Lalnunthara Nu, Pi Parvuli phei chu, a khua a sik a, a tlun nasat avangin Ruang thlalakpuinaah pawh a tel thei ta lo hial a ni.

Mitthi vui zawh hnu hian Kawrthah lam panin an kir leh a. Driver pawhin harsatna hi a nei ve thova, mahse tlawmngai takin Motor chu a khalh lui zel a, kawng lakah pawh vawi eng emaw zat an ding a. zan dar 9:00 velah Kawrthah an thleng a ni.

An pum lam dik loh avang hian February ni 20-ah Kawrthah Damdawiinah an in entir hlawm a, an nat dan a in ang tlang hle a, damdawiin lam thawktu te chuan Food poisoning vang nia hriain Kawrthah Damdawiin ah hian a na zual pahnih Pu H.Thankima (60) leh Pi Parvuli (52) te chu admit nghal an ni a, midang 8 te chu in lamah an in enkawl hlawm a : tumah pawn chhuak peih erawh an awm lo.

February ni 21 ah Pi Zoliani (50) pawh admit a ni leh bawk a. Damdawiin a admit te hi M.O. te hmalakna avangin uluk taka treatment pek an ni a, khawsik/tlun leh na tur ut ut chu an nei tawh hran lova, an kawthalo leh luak chhuak pawh ziaawm viau tawh mahse, a la kiansan tak tak lova, chanchin buatsaih lai hian an taksa pawh a chau tlang hle a ni.

february ni 22 Pathianni chawhnu lam khan an chaweina Hotel neitute hian Kolasib atangin kawrthahah hian damlo te tlawhin an kal a, Kawrthah Damdawiin a awm te leh in lama in enkawl te chu tlawhin damlo kanna te an pe hlawm a, thupha te chawiin ngaihdam te an dil a, mualpho taka siam lova, phone hmanga thil awmzia an hrilh avangin lawmthu an sawi a ni.

Zawhna chhangin Hotel neitupa chuan hetianga an Hotel-a chaw ei ho, Motor pakhata chuang zawng zawng ten hetianga harsatna an tawk ta mai chu, “Sa an hmeh kha a in ang lova, Vawksa ei leh Arsa ei an awm a, an zavaia an eitlan ber ni a rin, Bete hâng chhum kha a rinhlelhawm ta berin ka hria,” a ti niin thudawnna chuan a sawi.