Pi Khawsiamveli (Pi Siami), kum 42 W/o Lalsiamliana Rangvamual-a mi inluaha awm chu ni 2 chhung a awmna chin hriat a nih loh hnuah tukin 22nd Feb zing dar 10:30 vel khan Rangvamual kawng Four lane atanga Rangvamual lam kawngpui thlang mual mawngah thiin hmuh a ni.

Thudawn danin Pi Siami leh a pasal Pu Lalsiamliana te hi zingkarah hnathawkin ramah an chhuak dun thin a, nimin piah Zirtawpni zing karah pawh khan an thenawm dawrte-ah thil leiin an kal dun hmuh an ni. Hemi ni-a a pasal nena an chhuak chu Pi Siami hi inlamah a hawng ve ta lova. Chutia zanhnih ngawt mai chin hriat lohva a awm chu ngaihtha lovin khawtlang hruaituten Pi Siami Pasal Lalsiamliana chu thil awmdan an zawt a, engmah sawi duh lovin a tang tlat a, zu an in dun thu sawiin a chatthla nia a rin thu te'n a lo chhang a ni.

Chutianga engmah a sawi duh loh avang chuan khawtlang hruaitute chuan ring hlelin Vaivakawn Police station lam an hrilh ta a, an ni hian rinhlelh thilah thu zawhfiah turin Police Station lamah an la chhova, police hmaah hian a nupui ruang awmna hi a hrilh ta niin an sawi. Four lane bul mual mawng ramhnuaia Pi Siami ruang an zuk hmuh hian fel takin a lo mu a, a tukkhum leh bek vel a dup a, a hnungzang a duk nasa hle bawk niin sawi a ni.

Pi Siami te nupa hian fa 3 an nei a, an puitling deuh vek tawh a, an te ber pawh kum 16 mi vel a ni. Nikum hmasa khan Pi Khawtini building atangin Rangvamualah mi inluahin an cheng a, Rangvamual-a awm reng an tum loh avangin hmun dangah inluah tur te an dap a, thlanmual thawhlawm vel pawh Rangvamual khawtlangah an pek ngai lem loh thu thudawnna chuan a sawi. Pi Siami hi a nuta te Lungleng lamah an awm a, a ruang hi Lungleng lamah lak anih rin a ni.