Mizo Students' Union (MSU) chuan Mizoram Cabinert in sikul tandun a sawn hma chu an duh loh thu sawiin a tilui a nih chuan Session tan ni atangin an duh lohna na takin an lantir dawn tih an sawi.

MSU President Pu PC Lalrinhluna chuan Sikul tan hun tihma tura Cabinet thutlukna chu Mizoram zirna in hma a sawnna tur awm chuang si lo leh chhungkaw tin nunphung a harsatna a siam tur hre sa reng chunga zirlai nu leh pa te ngaihdan leh duhdan zah loa thu tlukna a siam ta mai hi roreltu ni tura thlang tlingtu mipuite thamlohna leh hmuhsitna lian takah an ngai tih a sawi a.
School Education department ngeiin mizoram chhunga school hrang hranga zirlai nu leh pa te a rawnnaah tuna kan school kai hun ngai ang a la kal duh hi za ah 85% an ni a, Sikul timing sawn hma rawn chhuahna bul diktak chu zirna siamthat tumna nilovin traffic problem tih ziaawm tumna a ni a. He thu ngaihtuahna hmasaber chu kum 2012 semtember 24 a Co-ordination comittee on traffic management meeting in traffic jam thin tih ziaawmna turin he thil hi a ngaihtuah atanga rawn chhuak a ni, a ti.

Tuna sikul tan hun kan hman mek hi mizorama boruak nawmhun lai ber leh hun nuam lai ber a niin he hun hi zirlai naupang te tan MSU chuan a tha berah an ngai tih sawiin Thlasik leh nipui pawh sikul tan hun tidanglam a ngai lo a tuna timing kan hman mek hi mizoram boruak nena inmil hle a ni, a ti a.
Sikul tan hma hian chhungkaw tam tak tana buaina nasa tak siam dawn a, Thingtlang a zirlai thahnem tak, mahni khaw thenawma lehlanga School kalte tan harsatna a thlen nasat dawn avangin he thil hi an duhlo hle a ni, tih a sawi bawk.

MSU te chuan khaw en hun chhung hman tangkai a nih theih nana timing tih danglam chu an thlawp a, mahse work culture leh timing tidanglam chuang si lova school timing chauh sawn hian awmzia a nei lo a ni, an ti bawk.
He thutlukna hi sorkarin sut leh se an duh tuh sawiin a sut lo a Academic Session thara hman a nih dawn chuan hman tan ni, ni khatni atangin duhlohna na takin an lantir dawn tih an sawi bawk.