MNF Action Committee-te chuan nimin khan Aizawl Press Club-ah thuthar thehdarhtute an kawm a; MNF a sorkar hunah buhfai man an tihhniam tur thu an puang a, MLPC Act ennawn an tum thu an sawi bawk.

Vanglaini palai zawhna chhangin MNF Action Committee chairman Tawnluia chuan, MNF a sorkar chuan buhfai man chu mipuite phâk tâwka an tihhniam tur thu a sawi.

Zu zawrh chungchanga zawhna chhangtu Lalruatkima, MLA chuan, "MNF party hian ramhnuaia a awm lai atangin zu zawrh a duh ngai lo. Congress sorkarin zu an zawrh hmasak pawhin MNF sorkarin a titawp a ni. Sorkarna kan chan chuan kohhran leh tlawmngai pawl hruaitute ráwn chungin MLPC Act kan ennawn ang a, zu zawrh kan tihtawp ka ring," a ti.

Tawnluia chuan, chhiah tihsan hrim hrim MNF-in a do lo tih sawiin, "Chhiah a ṭul anga ennawn hi kan pawm thlap. Mahse, uchuak taka tihpun hi tha kan ti lo," a ti a; MNF a sorkar chuan biak-in leh thlanmualah chhiah an lak loh tur thu a sawi.

Lalruatkima sawi danin, Dinthar thlanmual atana chhiah chawi ngai zat chu Rs. 1,72,433 a ni a, hei hi February 2015 ral hma pek tura tih a ni. YMA-in chhiah pek tur hi a neih mai loh avangin veng mipuiah pawisa an khawn a ngai dawn a ni.

MNF hruaitute chuan, Congress sorkar chu sum leh pai enkawl hlawhchhamah puhin, "Sorkar sum renchem loin, chief minister hoin nuam an tâwl a ni ber. Helicopter-in an zin reng a, motor thar an lei reng bawk si. Sorkar sum peipun dan an ngaihtuah peih lo a, an thâ a thum a ni.
Inrenchemna kawnga CM-in an hmalakna a sawi chu mineral water ûm tê hman thin a ni tawh tihte a ni," an ti.

Mizote'n an thawh ve theih reng contract hna lian zawng zawng hnam dangin an thawk fai vek nia sawiin MNF hruaitute chuan, "Inhlawhfa, thalaite tan hna thawh tur a váng em em tawh a ni," a ti a; Congress sorkarah miretheite retheihna a zual tulh tulh niin an sawi.

MNF hruaitute chuan, Congress sorkarah tualchhung sum lêng vêl a tlem tulh tulh thu te, sorkar leiba a san tulh tulh thu te, tar pension hun rei tak pek an ni tawh loh thu te, zirlai scholarship a hun taka pek theih a nih loh thu te, AIDS dona tur sum a awm loh thu te, sumdawng leh contractor- te'n bill an lak theih loh thute leh, sorkar hnathawk MR/GPF leh hlawh lak tur nei an tam tulh tulh thute an sawi bawk.

MNF hruaitute chuan, February 25, 2015-ah 'Mipui thlavang hauhna total bandh' an huaihawt dawn tih an sawi nawn a; bandh chu mipui, mirethei zawkte tan a ni tih sawiin, thlawp tur leh tawiawm turin mipuite an sáwm a ni.