February ni 6 Friday zan LPS Special report-a Health Department hotute ka kawmna-a min chhanna, a pawimawh zual lai laktawi

India rama thisen pek chungchanga thuneitu sang ber National Blood Transfusion Council chuan a support Hospital zawng zawngah blood processing fee lak vek tawh turin kum 2005-2006 khan thuchhuah a lo siam daih tawh a, State tamtak chuan processing fee hi NBTC thuchhuah angin an lo la daih tawh a ni. State hrang hrangin processing fee an lak tan kum te erawh a in ang vek lo.

Nationa Blood Transfusion Council-in fee lak tawh tur tih thuchhuah siam mahse Mizoram biakah chuan National Aids Control Organisation (NACO) atangin 100% min la tum sak tho avangin processing fee la lovin rei tak kan lo la kal thei a ni. Chutianga tanpuina NACO atanga rawn kal thin chu nikum April (tun financial year kal mek) atangin a lo tawp ta mai si a, hetih mek lai hian NACO lam atang chuan 75% min tum sak tur thu leh State in 25% tum ve se tiin lehkha erawh state sorkar lam chuan kan dawng a, chuti chung chuan engmah tanpuina erawh hmuh a ni ta chuang lo.

Heitianga tanpuina rawn kal a tawp takah hian ruahmanna han siam turin Department lam lah budget engkim insiam fel vek tawh kan nih hlawm avangin tihngaihna a vang hle a, tun dinhmun hi kan thleng ta a ni. Central atanga 100% tanpuina kan dawn thin lai khan state tam ber chuan Nationa Blood Transfusion Council hian tanpuina min pe reng thei dawn lo a ni tih ringin processing fee hi an lo la reng tawh zawk a ni.

(Thisen lak dawn hian thisen petu tur tan form fill-up ngai a awm ve a; damdawi a ti ngai em, natna thalo vei a nei em etc etc..fill-up tur a awm thin. Heng bakah hian a HB a hniam em tih te en a nih hnuah tehna tlangpuiah tling nia hriat a nih chauhin thisen lak sak a ni chauh thin...vnt) Chung thisen lak tawh te chu darkar ruk chhungin uluk taka exam hrang hrang tih leh vek ngai a ni a, Heng; Malaria, Hepatitis B leh C, HIV, VD etc. te hi thisenah a awm leh awm loh test vek a ngai a, miin a thlawn liau liaua a pek mah nise blood bag te a lo ngai bawk a, chutianga, thisen a thianghlim leh thianghlim loh test vek a nih hnuah component hmangin thisen kha thliar hran leh te a ngai a, an blood group te en leh vek hnuah a dawngtu tur nen cross matching tih leh vek a ngai bawk. Chutianga process tihna man vel chu private rate anga chhut chuan a lo berah cheng 1500/- vel sen ngai niin an sawi.

Chutih lai chuan Mizoram Sorkar Health Department hian processing fee 550/- tunah hian a la mek a, hei hian senso a phuhru phak lo hle. BPL leh RSBY free vek tur a ni a, thisen natna; Thalassemia te leh Hemophilia natna nei, thisen pek reng ngai ang chi tan free vek bawk tur a nih bakah emergency case-ah a thlawna thisen hi pek chhuah tur a ni bawk. Health care-a in register te leh sorkar hnathawk ten an bill let leh thei vek bawk niin Hospital lam thuneitu te chuan an sawi.

https://www.youtube.com/watch?v=O-BuC_dYV1U