Tunhnaia Raicheh-a boral Babie Zothanpari thih dan chungchangah a pasal Steve Lalhruaichhuaka, Kolasib Electric Vengin, Kolasib Police Station-a FIR a thehluh chu Kolasib Police ten Inrinni (17 february) atang khan an bawhzui nghal.

Babie Zothanpari pasal Steve Lalhruaichhuaka hian a nupui dam tha tak mai nia a hmuh, nau nei tura damdawiina a hruai luh chu hospital thawktute hian an tih tur ang an tih tawk lohna, thu dik tawklo an hrilh, emergency thil ni si thisen man lak hmasak hmaa thisen an pe chhuak duhlo leh an tih manganna, duty thenkhatin tawngkam hriat hreawm tak hmanga an tawng khum nia a puhna te FIR ah hian a tarlang.

Kolasib atanga thu kan dawn danin Police te hian he thil hi an bawhzui nghal a, Doctor duty te thu an zawtfiahin statement te an la nghal a. Hospital hotute chuan he vanduaina thlengah hian vanduaina tawkte hian thil hriatsual palh an nei nia an rin thu an sawi ve bawk a ni.

Thisen pek chungchangah hian a hun taka pek loh a awm lo va, thisen sawngbawl chhung hi minute 30 vel nghah a ngai ve hrim hrim niin an sawi a, blood bank lam pawhin blood bag hmanga thisen dah thatte chu khawl hmanga enfiah hmasak vek a ngaih avangin hun a ngai ve hrim hrim a, pawisa neih loh vanga tihkhawtlai a ni lo tih an sawi.

Zothanpari thih dan chungchangah Kolasib District-a Doctor thawk lai, Dr. Lalhminghlua'n Medical Certificate-a ziahah, a thih chhan hi 'Hypovolemia' leh 'Neurogenic shock' tih a ni.