Lunglei district chhungah loan rulh that loh thubuai 132 a awm .
Lunglei District DCC/DLRC/DLSC chu nimin khan an chairman, Ashish Madhaorao More, Lunglei DC hoin a pisaah an thukhawm a, Lunglei district chhunga bank hrang hrangte hmalakna leh mipuite tana hna an thawh dante an thlirho a, loan rulh that loh thubuai 132 a awm tih an sawi.

Ashish Madhaorao chuan, PMJDY hnuaia chhungkaw tinah bank account pakhat tal hawn tura sorkar laipuiin a duan chu ngai pawimawh zual turin bank aiawhte a chah. Bank aiawhte chuan loan rulh lamah mipui an inthlahdah thu sawiin, "Tunah hian loan rulh tha lo thubuai 132 a awm a, chungte chu cheng nuai 282.94 hû a ni a, hei hian loan pûk duhte tan pawhin harsatna a siam thin," an ti.

Meeting-a tarlan danin, nikum khan Lunglei district chhungah mipuite bank kalhmang leh scheme hrang hrang zirtirna hun, ‘Financial Literacy Campaign’ vawi hnih neih a ni. Meeting-ah hian State Bank of India, Canara Bank, IDBI, Mizoram Rural Bank, Mizoram Cooperative Apex Bank, Axis Bank, Syndicate Bank leh line department hrang hrang aiawhte an tel a ni.