Tui bill tihsan avangin Khawzawl mipuite chuan February 11 tlai khan Khawzawl PHE Watsan Division pisa tualah lungawi lohna an lantir a; buaina lian tham a chhuak lo.

Thu dawn danin, lungawi lohna lantirnaah hian mi 100 vel an pungkhawm a; Khawzawl Joint V/C, Mizoram Consumers Union, Khawzawl Branch leh PHE hotute nen an inkâwm zui a ni.

PHE hotute'n tui bill kalphung an sawifiah hnuah V/C leh MCU hruaitute chuan mipui lungawi lohna hrang hrangah a ṭul anga hma la turin PHE hotute an ngen a; sawihonaah hian tui metre reading chu lak that leh vek a, tui bill thar chu a dik leh dik loh ennawn leh ni se, an ti.