Mizoram sawrkarin MW 210 siamchhuak thei tur Tuivai HEP siam tura NEEPCO nen inremna an ziak chu PRISM chuan sut leh turin a phut. Sawrkarin mi tute emaw MoU a ziahpui dawnin Law & Judicial Department-in a enfiah a, a pawmpui hmasak a ngai tih sawiin Mizoram sawrkar leh NEEPCO-in tunkar thawhleh zana inremna an ziak chu Mizoram Law & Judicial department-in an enfiah leh pawmpui anih loh avangin MoU ziah chu dan kalh a ni an ti.

NEEPCO-in MW 60 pe chhuak thei tur Tuirial Hydel Project chu thawhzawh hun tur an ruahman-ah an thawk zo thei lo tih sawiin PRISM chuan MW 850 pe chhuak thei tur Lungreng HEP te, Mw 635 pe chhuak thei tur Chhimtuipui HEP te,MW 76 pe chhuak thei tur Mat HEP te siam turin kum 2011 khan Moziram sorkar chuan MoU a lo siam pui tawh tih sawiin hengah te hian NEEPCO hnathawh engmah hmuh tur pakhat mah a awm lo tih an sawi bawk.

PRISIM chuan kum 2008-2012 inkarah Mizoram sawrkar chuan power siam chhuah nan company hrang hrang nen MoU 9 an lo ziak tawh a, hengah te hian awmze neia bawhzui a awm lo a ni,a ti. Ministry of Finance-a Department of Economics Affairs (DEA) chuan megawatt 210 pe chhuak thei tur Tuivai HEP hi viability gap funding (VGF) hmanga PPP mode-a siam a remti a; chief minister Lal Thanhawla chhuan Tuivai HEP chu DEA pilot project niin a sawi.

NEEPCO hi sorkar laipuiah Tuivai HEP thawh phalna dilna hun atan kum khat hun pek an ni a; chumi hnu kum thum chhung chu Forest Clearance, Environment Clearance, etc. tihfelna atana hun pek leh an ni ang. Chumi hnu kum khat chhunga hna an thawk lo a nih chuan inremna thuthlung chu sût a ni ang. Hna thawh tan atanga kum nga chhunga thawh zawh tur a ni. Tuivai HEP atana MoU hi State Guest House, Chaltlangah ziah a ni a, Mizoram sorkar aiawhin P&E secretary RK Gupta leh NEEPCO aiawhin NEEPCO CMD , PC Pankaj ten hming a ziak.