Feb 11, 2015, Nilai zan khan Arunachal West Mission Field, Naharlagun hmuna Baptist Church of Mizoram Missionary Pu L.H. Lalnghakmawia (Manghaka) Serkawn, Lunglei chu Guwahati atanga Naharlagun a pan tur chu Guwahati-ah misualin a thil ei-ah damdawi pawlhin an hrai rui a, engmah hre lova a awm laiin a thil neih, a bungrua zawng zawng an chhuh sak vek.

Amah hi Hospital pan pui a ni a, ala harh chiang vak lo na in, ngaihtuahawm lutuk erawh a ni lova thudawn a ni. Manghaka hi an unau zing a mi, Tripura-a Baptist missionary pension ta, Upa L.H. Sangliana (Serkawn) boral ruang rawn thlah liama Mizoram lo chuang chhuak lawk a ni a, a hnathawhna lam a pan leh laiin vanduaina hi a tawk palh ta a ni. Arunachal Pradesh ah hian kum 20 dawn rawngbawlin alo awm tawh.

PU DINGTE-A, AMAH LO BUAIPUITU SAWIFIAHNA:
Manghaka hi thil kan zawt tamin kan zawt chik duh vak rih lo a, Naharlagun a rawn thlen hlima thil awmdan kan zawh chuan, a chau viau na a, min chhan dan a consistent khawp mai a. Nimin chawhnu dar 3 vel khan Guwahati ISBT ah Naharlagun (Itanagar) bus ticket a la a, zan dar 7 a chhuak tur a ni daih a, Khawpui chhunga lut tawh chuang lovin a hmunah a nghak ta mai a ni.

Amah maia khawhar ang reng tak leh thian mamawh taka a awm lai chuan, amah hrai ruitu nen hian inchharin an inzui nual hman a ni ang. A fel viau mai a, eitur te pawh a pe thin a, a la duh lem lo va. Mango Juice erawh chu a la ta a, straw vuahsa a ni a, a han in/fawh zawh chuan, a lu a hai a, a mit ta sulh sulh mai a ni awm e.

Engmah a hre zui tawh lova, a han harh leh chuan zing khua a lo var tan tawh a, a Laptop leh Mobile phone a awm lova, a Wallet/purse a awm lo tih a hrechhuak ta bawk a ni. Vanneihthlak takin a Jacket a phelh sak lova, a hnuaia a Kamis-ah pawisa tlemte a lo la ak hlauh a, chu chuan, Itanagar check gate thleng bus ticket a la leh ta a, chau lutuk tak maiin bus-ah a lut thei hram hram a, tlai dar 2:30 vela Itanagar gate (Banderdewa) atangin Naharlagun City bus service a rawn man leh hnu ah, Arunachal mi phone hawhin a chhungte Mizoram lam ami te a han phone thei ta a. An ni'n helai (Arunachal)-a thawktute an rawn phone leh ta a ni.

BCM Mission Secretary leh Aizawl Executive Secretary te hriattir anni a, anni hian Guwahati a Regional Director an hriattir leh a, Guwahati lamah a theih ang tawkin Regional Director Office Staff Isaac Chinzah ten an chhui a, Naharlagun leh Itanagar lamah Guwahati to Naharlagun/Itanagar bus kal zawng zawng kan lo chhui ve bawk a, kan phek buai a ni.

NETWORK bus driver pakhat chuan Guwahati bus Terminal ah mi pakhat, sa tha deuh engmah hre lo a let reng chu a passenger a nih ringin kaihthawh a tum a, a harh theih loh thu a sawi a, a bus seat a full vek tho si avangin midang passenger a nih a ringin a rawn tlansan tak thu a sawi a, chu chu Clue kan hmuh hnai vai ber chu a ni a, a bak chu tlai dar 3 vela Mizorama an chhung ten Banderdewa check gate a rawn thlen tawh thu an rawn sawi hi a ni ta a ni.

Amah hi a la hai deuh na in, hma a sawn chak viau a, vawiin lam hi chuan ngai a awh theih mai kan beisei.