9 February 2015 Tunlai hian Serchhip Hmar Veng Kohhran ah Harhna nasa tak a thleng mek a, he Harhna hi Thalai te ah a thleng nasa bik. Harhna changtu te hian zing khawvar tirh atangin BiakIn leh a chhehvelah te tawngtaiin hun an hmang ber a, Thlarau Thianghlim naute hring pawh 9 vel zet an awm tawh nia sawi a ni a, heng an naute hrin nia sawi te hi puan a tuamin BiakIn Maicham bulah an dah a, Thlarau lama mit tihvar thenkhat nia insawi te phei chuan nau an hrin te hi an hmu thei a, mipa leh hmeichhia a nih te pawh an hre hrang thei hial nia sawi a ni.

Heng Thlarau thianghlim fa nia sawi te hi tun inrinni zan inkhawm dawn khan lak sawn an ni. Heng mihlim, harhna changtu te hian a chang chuan Biak In hungchhunga lut tur te chu pheikhawk bun te an phal lova, kar kalta nilai zan inkhawm tur te leh inrinni chhuna BiakIn lut tur te pawh a lema a lan ang hian BiakIn hung pawnlamah pheikhawk an phelhtir zel a ni.

Serchhip Hmar Veng Kohhran ah Harhna thleng mek hi Krismas leh Kumthar vuakvet atanga intan chho a ni deuh ber a, mi thenkhat te phei chu Kelkang harhna te chhimin an han kal bawk a, zing chhun zanin tawngtai a Pathian pawlin hun an hmang deuh ber a, a chang phei chuan khawlai ah te kalkualin Hnehna Hlado te an chham thin a, Serchhip khawchhung Kohhran hrang hrang atangin he Harhna chhim hian mihlim rual te an rawn tlawh fo bawk.

Serchhip Hmar Veng Kohhran Committee chuan Harhna hi mitinin chang se an duh rualin a bik takin zirlai te erawh chu an zirna tibuai zawnga Harhna hi dawngsawng lo se an duh thu an sawi.