January 9, 2015 zana Republic Venga Sangliansiama te chhungkuaa mi panga thattua puh, Laltlanchhuaha (37) s/o Parzuala, Republic Veng chu IPC 302 hnuaiah tualthah thubuai leh IPC 449 hnuaiah mi ina luta pawi a khawih thubuai siamsak a ni a; thubuai dang pawh la awrh zel theia ngaih a ni.

Aizawl SP C Laldina chuan zawhna chhangin, Laltlanchhuaha chu IPC 302 hnuaiah thiam loh chantir a nih chuan dam chhunga lung- ina tán tura hrem theih a nih thu a sawi a, "IPC 449 hnuaiah chuan kum 10 thleng lung-in tàn leh pawisa chawi hmanga hrem theih a nih bakah, thi tura hrem theih a ni," a ti.

Police-te'n misual leh tualthat an hum thin chungchanga Vanglaini zawhna chhangin Aizawl SP chuan, India danpui Article 21 chu police-te'n an ṭan chhan a nih thu a sawi a, "Mi tu pawh dânin thiam loh a chantirte chauh lo chu an nunna leh an dikna chanvo laksak loh tur a ni. (No person shall be deprived of his life or personal liberty except accoding to procedure established by law)," a ti.
C Laldina chuan, "Police kan nih avangin India danpui hi kan rinchhan a ngai a, dân kan kenkawh a tul avangin misual leh pawikhawihtute hi kan hum a ngai thin a ni," a ti bawk.