HIV/AIDS dona kawnga Mizorama hma latu, NGO 37 te chuan sum an hmuh thin ang an hmuh theih tawh loh avangin hna an thawk mumal thei lo a, ruihhlo ti thinte leh KS te an enkawlna tam zawk an titawp tawh.

NGO 37 intelkhawmna, Federation of NGO's working in the field of HIV/AIDS Prevention and Care-a an President Pu John Thansanga chuan National Aids Control Organisation (NACO) in an hnathawhna tura nikum September thla-a cheng nuai 820 Mizoram sorkar kuta a pek tawh chu vawiin thlengin Sorkarin a la pe chhuak thei lo tih a sawi a, hei vang hian ruihhlo ti thin te leh KS te HIV/AIDS laka an himna tura an hmalakna tam zawk chu an kalpui chhunzawm thei rihlo tih a sawi a. NGO thenkhat chuan anmahni thahnemngaihna-in mimal sum te pukin ruihhlo ngai te leh KS te hi an la enkawl hram hram tih a sawi.

Ruihhlo-a inchiu thinte'n zawi zawia an bansan theihna tura damdawi an pek thin OST pawh hmun thenkhatah chuan pek theih a ni tawh lova, tuna an enkawl mekte bak midang an lak belh thei rih lo tih a sawi. Shalom Project Director Dr. Chawnglungmuana chuan Mizoram chu HIV postive tam lamah pahnihna a ni tih a sawi a. Tunhnaiah ruihhlo-a in chiu thin an pung nasa hle tih a sawi.