Mizorama ramhmul chi khat Anchiri chu Mizoram sorkarin a rem mai hlaua a khuahkhirh laiin, Lai Autonomous District Council huamchhung ah chuan sorkarin sum hmuhna peng pakhatah hmangin Mahaldar hnenah Anchiri lak phalna a pe a, Mahaldar ten an leikhawm mek.

Lai Autonomous District Council (LADC) Forest department chuan LADC huamchhung chu zone thum ah thenin Sangau tlangdung lamah chuan Anchiri hi a awm mumallo a, LADC area khawthlang lamahte chuan a awm thung a, LADC sorkar chuan Mahaldar pahnih hnenah lak phalna a pe chhuak a, heng mite hian tunlai hian leikhawm mekin kg 1 Rs 10/- in an lei mek a ni. Anchiri awmna khuaa mi engemawzat chuan sum hmuh nan ber an hmang mek a, LADC Sorkar chuan a rem mai loh nan Anchiri hi leiseh chin ah bak lak a phallo a, hetiang a lak a nih chuan a rawn chawr tha leh mai thin niin an sawi.

Anchiri hi tunhma chuan Forest department hnuaiah Mahal thin a ni a. Perfume leh puakthei thil siamna atan te hman thin a nih avangin vairam lamah hralh a kal em em a ni. Hei vang hian Mizoram hmun hrang hrangah a ruk a hralh a hluar hle a.

Mizoram Ramhmul hnim hlu tak a nih avang leh a rem hlauhthawnna avangin Sorkar pawhin hralh phalna (permit) pawh 2010 atang khan alo titawp tawh a ni. Hetianga LADC huamchhungah Mahal system a sorkar sum siamna atana hman a nih mek lai hian, Aizawl leh Mizoram hmun dangah erawh chuan khuahkhirh mek a ni thung a, thla liam ta January 19 pawh khan Anchiri bag 12 Saikhawthlir daiah manin a tih rona hmun pawh Kawrthah forestin a tihchhiat sak nghal a, heng phalna la lova anchiri bag 12 an man leh a urrona hmunte hi Lalnunsanga Khawlhring DFO Kawrthah leh a hote hian Saikhawthlir daiah Saiip 12 an man bakah a ur ro na hmun hi an tichhe nghal a ni.

Kumin February 3, 2015 khan Vairengte Environment & Forest department staff te chuan report an dawn bawhzuiin, Phainuam panna kawng peng bulah Anchiri hring quintals 22.40 an lo man tawh bawk.