National Highway 44-A-a Sihhmui leh Lengpui inkara Tlawng lei, 2017 October ni 31-a chim chu February ni 1 2015 atang khan ngawrh taka dawh that tan a ni. He lei chim hi dawh that zawh tep a nih hnuah nikum December ni 8 khan a chim nawn leh a, hemi hnu hian lei chim chu kah buna, a dawhna hmanraw thalai lak khawm a ni. amaherawhchu a hmanrua hi a tam tawk loh avangin Kolkata-a Garden Reach Ship Builders & Engineers Ltd. atangin cheng nuai 11 chuang man chah belh a ni a, hengte hi nizan khan lei dawhna hmun, Tlawng lui kam phurh thlen a ni a, PWD hnuaia Mechanical Division-a Engineer-te leh hnathawktu dangten heng hmanraw hmang hian hna an thawk tan a ni.

Thawhtanni atanga lei dawhna thir rem khawmtute hi mi 18 an ni a, nimin khan mi dang 13 tirh leh an ni a, heng mite hian lei dawhna hmun lui kamah camp siamin chhun leh zan zawmin hna an thawk dawn a ni.
Mechanical Division Engineer chuan, lei dawh zawh theih hun tur chu a la sawi theih rih loh thu a sawi a, hnathawh chak dan a zirin rei lote-ah zawh theih hun tur chu a hriat theih dawn niin a sawi a ni.

He lei chim avang hian Mamit Dist.-a khaw hrang hranga zin tur leh Lengpui tumhmuna kal turte chuan kawng hlui kual tak leh thui tak an zawh a ngai a, hei hian nikum November atanga tun thleng hian mipuite harsatna a la siam zui zel a, he kawng chhiat avanga mipui senso hi cheng nuai za tel tak meuh a tling tawh a ni.
.