Mizoram pumah January thla tawp thlengin mi 3,40,542-te Biometric Enrolment tihsak tawh an ni.

Aizawla Census Office hotute chuan, Supereme Court-in Unique Identification (IUD) titawp turin thu a pe anga thuthang chu an hriat an hriat ve loh thu an sawi. Sorkar laipuia Ministry of Home Affairs hnuaia Directorate of Census Operations-in ram mipuite chhinchhiahna a kalpui mek UID chu Supreme Court-in titawp turin thu a pe tih thuthang a awm a; hemi chungchang hi Vanglaini palai chuan Census directorate lam a zawtfiah a, UID tihtawp lam thu Central aṭanga an la hriat loh thuin an lo chháng a ni.

Census Office-a hotute chuan, UID/biometric enrolment chu March 31, 2015 hmaa tih zawh vek tur a ni tih an sawi a; hun tiam chhunga zawh hman ngei tuma tan an lak zel thu an sawi.

Census Office hotute sawi danin, DC tin pisa leh leh block tina BDO pisaah permanent enrolment centre hawn tur a ni a, DC pisa tinah chuan hawng tawh mah se, BDO pisaah erawh chuan an la hawng thei lo a ni.

Sakawlh hlau nia insawite chungchanga zawhna chhangin Census hotute chuan, "Khaw hrang hrangah an awm ve deuh zel a, sorkar policy a nih dan leh a pawimawhna kan hrilhfiah hnuah chuan mi tam takin an tih leh phah tawh a ni," an ti.

Sakawlh hlauhna leh biometric enrolment ti duh lo an awm thu hi December 17-18, 2014-a Central-in meeting a kohah pawh an sawi chhuak a; Central lam pawhin mak an tih thu leh an hriatthiam loh thu leh, hetiang mi hi Mizoramah chiah an awm thu an sawi a ni.

Census office hian Aizawl, Lunglei, Saiha, Lawngtlai, Serchhip, Champhai, Kolasib leh Mamit district-ah mi 3,40,542 chu biometric enrolment an tihsak tawh a; biometric enrolment tih tura ruahman chu mi 8,64,760 an ni a, la tih hmabak mi 5,24,218 an awm a ni.

District hrang hranga zawh hun tura ruahmanah zo hman lo mah se, March 31, 2015-ah chuan zawh hman vek an tum a;
district panga - Aizawl, Kolasib, Mamit, Champhai leh Serchhip district-ah LYRA company-in an buaipui a.
Lunglei, Lawngtlai leh Saiha district- ahte ISS-in an buaipui thung a ni.