February ni 2, 2015 khan whatsapp leh facebook group thenkhatah Venghlui-a Pu Thandanga te khum pindana chaw leh sa hmin sa lo awm thin chungchang a darh nasa hle a hemi chungchangah hian Pu Thandanga nupui Pi Chullovi chuan a chhan an hriat tawh thu leh he thil thleng chungchang hetiang hian min hrilh.

Kar kalta Zirtawp ni (30 january) leh Inrinni khan chaw leh sa hminsa fun hi kan fanu khumah hian a rawn awm ringawt mai thin a, Inrinni a mi ah phei chuan bawng thin kan kg chanve vel zet tur hi a tel bawk a, inah tumah an rawn luh kan hre bawk si lo. Mak kan ti hle mai a, nimin sunday-ah erawh a awl a.

Tukin zing chaw kan ei dawn dar 8:30 velah chuan kan fanu khumah bawk chuan chaw hminsa leh sa leh alu te nena chawhpawlh sa la lum tha tak mai fun thum kan han hmu leh ta mai a. Kan inah tumah an rawn luh kan hre bawk si lo. tukverh teruhte chu pawn lam atanga banphak rual niin kan ngai bawk si lova, vawithum ngawt mai chutiang kan tawng ta chu thenawm te kan hrilh a, an rawn en lat lat hlawm a. A ngaihna kan hrelo em em mai a ni a ti.

Tukina an rawn en laih laih lai chuan an thenawm nu te inhnuai pan thlakna stepah hmanni deuh khan dal leh chini fun an hmuh tawh thu te an sawi bawk a, mak kan ti hle mai a ni tiin Pi Chullovi chuan min hrilh.

Vawiina an bedroom-a thil an en laih laih hnu lawkah chuan chawfun pakhat khat dang hi a rawn awm leh nawlh mai a, hetih lai hian an thenawmnu chuan an veng ep chiaha parawl (a hming hi sawilang lo mai ila) pakhat chu a chet vel danah ring hlelin an lo thlithlai ru-a, Pi Chullovi te inbul lungremah thei leh theilova lawnin tukverh-a chawfun dang pakhat a vawrh lut lai chu an lo hmu hlauh mai a, chu pa chu hmanhmawh takin a in lamah a kir leh nghal a, anni chuan um zuiin- engvanga chutiang a ti nge a nih, A hmaa mi te pawh kha a tih vek a ni em -tiin an a inah lenchilhin an zawt nghal a. Ani chuan zep miah lovin tha takin a lo chhang a. "Ka antenna chak tak mai chuan ka bengah hian chiang tak mai hian riltam ei tur neilo a awm thu min hrilh thin a, eitur ka pek loh chuan ka awm a nuam thei lo a ni" tiin a lo hrilh a, chu thil a lungkham avang chuan zan tamtak a mut tawh loh thu te pawh a lo hrilh a ni.

He pa hi pa ngawichawi leh pa tha tak mai a ni a, mi pawi sawi tum lam ni lovin, rilru lamah harsatna nasa tak a neih avangin hetiang hian mi dang tanpui nia inngaiin thil a lo ti thin a ni tih hriatchhuah a ni ta a ni.

Eitur a dah thinna in chhehvelah hian a hma pawhin eitur an hmuh ngei beiseiin a lo dah thin a, an hmuh thin loh avangin amah bawk chuan mi hmuh loh laiin a seng leh thin tih thu te a lo hrilh bawk a ni.

He pa khawngaihthlak tak hi vawiin lamah khan Psychiatrist an panpui nghal niin min hrilh bawk.

Source : Vanneihthanga Vanchhawng