AW HALEULUIA! LALPA ROPUI BER – K.H.B. 8
Phuahtu: Upa L. Kamlova.

Aw, Haleluia! Lalpa ropui ber, A fakna kil tinah fawn se. Vanbawng Kohhran Upa chhuanvawr tak Upa Vawma chuan lenkhawmnaa an sawihonaah, ‘Leilung pian laia talh tah Beramno,’ hi chu an lak/ entawn (copy) sual a ni ang e, ‘Leilung pian lai ata tawh Beramno,’tih a ni zawk ang a, ni tur pawh a ni e,” a ti a, lengkhawm ho chuan an nemnghehpui thlap a ni!
Chung lai chuan, Zofate Pathian thu hriatna a la hniam hle a; mahse, an RING BUR mai a ni. Üpa L. Kamlova hian engtia lo hre bik nge a nih aw!”tiin a ngaihtuah theih a.
A chhan chu – Pastor Liangkhaia’n Pulpit-a a thusawi a ngaihthlaka a hriat a ni a, chu a Pathian thusawi ril tak chuan a rilru a kam ta riau mai a; tichuan, he hla hi a lo phuah thei ta a ni. “Kei zawng ka hlaphuahte hi ka thiam vang a ni lo va, Pathian Thlarau min pek a ni e,”a ti reng a ni. Kum 1930 hnu lamah phei chuan a phuah ta ngai lo a ni. Upa L. Kamlova hi kum 1901 khan Mualphengah a piang a, heath hian kum rei tak a awm hnuin, an lal duhsaknain Tawizoah buhchhun eiin lal angin a awm leh ta a ni. Buai laiin Aizawlah lo lutin, Mualmawi Vengah In neiin a khawsa a, kum 1988 khan Lalpa’n a hnenah a hruai ta a ni.

1. Aw Haleluia! Lalpa ropui ber,
A fakna kil tinah fawn se;
Hnam tin Lal ropui leh zahawm ber chuan,
Mi thinlung chhungah thu han sawi leh rawh.

Hruai kir leh ang che kal bo tate,
Muthlute chu kai tho leh ang che;
Khawvel hruaitu, Arsi ropui ber,
Bona ram leh lungngaihna ram chhun eng rawh.

2. Lal Davida leh hruaitu Mosi-a,
Lei arsi lian an her liam ta;
Tunah Lal Krista leh Thlarau Thianghlim,
Kan Puithiam Lalber leh kan Arsi chu.

3. Tui leh leilung reng an din chhuah hmain,
Hriat phak loh Pathian i lo ni;
Ni leh thla leh arsite zawng zawng khian,
I zarah enna ropui an nei ve.

4. Thuneihna ropui, chawimawina sang ber,
Malsawmna nei tlak a ni e;
Leilung pian laia talh tawh Beramno,
A thisenin khawvel chhandam rawh se.