Z☼ BL☺G
GalleryForum|Download|Home|About me
Date: 28-03-2024
Time: 22:39

Tuirial jail Break

ESCAPE FROM TUIRIAL JAIL
he post hi ‘lushai-er’ tih in ‘mi(sual).com’ lama a post- ‘Escape’ tih bu Pu C.Zama ziah atanga a kaihtawi a post a ni a..
TUIRIAL JAIL CHU: Tuirial Jail hi Aizawl Jail-ah (Millenium Centre awmna hi) tang an tam ţhin em avangin temporary deuh va sak a ni a. A hmun hi NH 54 atanga peng in khawchhak hawiin kan tlan a, Airfield panna kawng hmar lama a her kualna laiah ding lamah a awm a ni. Tuirial Jail hi thirhlingnei (barbed wire) 15 ft a sanga hung a ni a, A zau zawng hi a vang 50m leh a dung 100m vel a ni.

Thirhlingnei hungna hrulah chuan ralveng awmna duty post(watch tower) 15 ft a sang ah 100ft dan vel zelah a awm a, watch tower 4 dan zelah LMG (Light Machine Gun) an bun bawk a, duty hi chhun zan zawmin (24×7) an duty reng thin. Jail chhungah hian tang-ho dahna in (ward) 3, choka 1, tuizem pakhat a awm a. Jail pawnah hian CRPF Barrack leh Jail Office chu Gate sirah chuan a awm bawk a ni. Ward No. 3 hi pindan 3 ah thensawmin a hmar lam ber chu Non Criminal Lunatic (NCL)- Mi a dahna tura tih a ni a, mahse mi ä an awm loh avangin a ruak a. Pindan laita pawh a ruak a ( Biak inah an hmang), A chhim dep ber chu tang riahna a ni.

Tuirial Jailah hian mi 60-70 vel an tang a, an zinga 20-25 te chu Political Prisioner (MNF) an ni a, a dang zawng chu criminal case leh Foreigner case-a tang an ni hlawm. Tang te hian an zing atangin Board of Controller (Jail manual-ah a awm lo, tangten an siam chawp a ni) an thlang chhuak thin a. He board hian Jail tangte displine an kenkawh ve bakah administration-ah an pawimawh em em a ni. Kum 1979-a Tuirial Jail tangte’n Board of Controller hotu atan a an thlan chu Pu Ngaihchhinga a ni.

TLANCHHUAH AN REL: Tuirial Jail-a tang zingah hian tlanchhuah tum tlat pawl an awm a, tul ti lem lo an awm bawk a. Tlanchhuah tum ho chu Pu Lalhmingthanga’n a ho va, chungte chu Lalhmachhuana, Lalrawngbawla, Vanlalvena, Lalbiaksanga, Lalrengliana, Lalfima, Hmingtea leh Tanpuia te an ni. Board of Controller hian tlanchhuah a rem ti lo va, tum 2/3 lai an sawi ho hnu chuan tlanchhuah tum chu a rem tih pui thei ta a. An tlanchhuah dan tur an sawi ho leh a, reife an chai hnuah a remchang leh tha ber nia beisei chung leh a chhe ber thleng palh pawh ni se tuar huam chungin lei verh an ti tlu ta a.

An thil tum hriatchhuah a nih lohna turin ruahmanna fel tak an siam a. Board of Controller kaihhruaina hnuaiah Security Cell an din a, member te chu Lalauva, Sangthanga, Lalfima leh Lalhmachhuana te an ni. Security Cell te hian tang dangten warder-te an kawm fal em, pawn lamah lehkha an thawn chhuak ru em, rinhlelhawm an awm em tih an enthla reng dawn a ni. Lung in tang tupawhin pawn lama lehkha thawnchhuah a duh chuan, a lehkha ziak chu Board of Controller a entir hmasa tur a ni. Entir hmasa lova thawn chhuak an awm chuan an chungah action na taka lak a ni ang tiin an vaukhan lawk a. Jail chhunga infiamna chi hrang hrang awm te pawh Jail tangte tan anih angin warder-te khelh ve pawh a rem ti lo.

LEI VERH TURIN AN INPUAHCHAH TA: Lei verh tan nan chuan ward no. 3 NCL pindan ruak kha remchang berin an hria a, Jailor hnenah Martial Arts zir nan dil an rilruk ta a. An han dil chuan Jailor chuan a thlirpui thuak thuak a, a rem ti ta mai a. An zir laia an tluk nat loh nan leivung pawn a mi lakluh a phalsak bakah buara chhungah lei an hnawh puar a, 3 lai an khai a. Hetih lai hian Pu Rochhunga, Laipuitlang-in Jail chhungah in, contract-in a sa a, in satu mistiri hnenah chuan thingphel 6ft a sei 4 an dil a. Mistiri chuan phal takin a pe a. Thing phek 4 chu a tlangah savunin kaihthleh theihin an kilh zawm a, mistiri hnenah suahdur leh bawngtuthlawh an dil leh a, phal takin a lo pe leh mai a, tuboh leh zel han dil chu an hreh ta deuh va, a rukin an ruk sak ta a. Hmanrua an duh ang an neih kim hma hian kar 3 lai martial arts hi an zir hman a ni.

LEI VERH ŢAN A NI TA: Leiverh ţan ni atan chuan ni 14 August 1979 an ruat a. Ni danga an tih ţhin ang bawkin an tlan kual zawh hnuah chuan pindanah chuan an lut khawm a, chhung lamah kawngka an kalh a, zawite, mahse khunkhan taka Pathian kaihhruaina ngenin an ţawngţai rual a. Kawngkhar awng atanga in chhung a lan loh nan kawmawl an zar a. Thenkhat ring takin an au a, buara khai an pet ri ţhuai ţhuai a, chutih lai chuan thenkhatin lei an lo lai thung a. A bul ţan ni chuan 3ft a zau, 6ft a thukin an lai a, a vung chu bang leh a lining na inkarah an dah a. An laih khuar zawnah chuan thingphel savuna an kilhkhawm kha an dah a, lei an vur hnan a, an tin san ta a. Chutiang chuan ngawrh takin an beih chhunzawm zel a. Security Cell te hian warder, Jail thuneitu dangte, lei verh lai tibahlah theite chu an thlithlai reng a, buaina a awm dawn chuan martial arts zirlaite an hrilh vat a, annin lei hnuaia hnathawkte an hrilh chhawng leh a. Warder-te a chhunga an luh meuh chuan hnuhma lang lovin an thup fel hman vek ţhin.

Back to posts
Fakselna a la awmlo.

UNDER MAINTENANCE
Category ☻
Zoram crimes and Accidents
Zoram Politics
Zoram History
Chakma
YMA
Thlarau Hnathawh
General Knowledge
World

NEWS HEADLINES ↓
Read More...
~

Quote :
Thanks for Visiting Me
Please Share On

Design by ZoBlog
Copyright : 2015-2100 ©
Powered by ZoBlog


pacman, rainbows, and roller s