Hmanlai Mizo Bawih hrang hrang te hi hre ve mai mai teh ang.

CHEMSEN BAWIH
Mi in tualthat se amah kha thah let ngei tura ngaih a ni a. Mahse tual thattu khan Lal In ah tlan lût se, inhumhim nan Lal sut ban kha va vuan ta se khawih thiang a ni tawh lova. Lal khan a lo humhim thin. Mahse amah kha Lal bawih ah a awm a ngai ta thung tihna a ni a. Hei hi Chemsen Bawih an ti. Intlan chhuah nan Rs 40 a ngai.

RETHEIH BAWIH
Mi tu pawh retheih vangin inchawm thei lo se Lal In ah a lût ang a. Lal Bawih ah a awm thei. Hei pawh Rs 40 a tlan chhuah theih an ni.
Retheih bawih leh chemsen bawih te hi Lal In chhung luh dawn a pindan an siam ah an cheng mai thin a. He pindan hi VANLUNG an ti.
Amaherawhchu Hnamtë zinga mi hi Sailo Lal in Vanlung ah an awmtir ngai lo. Hei hi Sailo thlahtu te leh Hnamtë thlahtu Chhanpiala ten inremna an siam vang a ni awm e.

TUKLUH BAWIH
Hmanlai chuan Indo leh Inrun a tam em em a. An do te khua a Mi an man chuan Sal ah an hawn thin a. Chu chu Tukluh Bawih an ti thin. Khualzin man mai duh te pawh an awm bawk a ni awm e.

PACHHUAK BAWIH
He thil lo chhuah dan hi a mak ang reng hle. Lallula Zopui khaw lal hmingthang tak kha rálhrât zet mai a ni a. Hetih hun lai hian Champhai zawl ah hian Fenngo (hmar) an awm a. Leilet te pawh an siam ni a sawi a ni a. Ralte ho hi Run lui kam ah khián an awm bawk a. Ralte ho chuan Fenngo te chu an rawk fo mai a. Fenngo ho mangang chuan Lallula chu an pun a, 'Min chhan la, i khua leh tui ah kan awm dawn nia' an ti a. Lallula chuan Ralte ho chu a han sawisa ta chiam mai a. Tam tak a that a. An Lal Mangngula pawh a that nghe nghe.
Chuta chin chu Fenngo te chu Lallula khua leh tuiah an awm ta vek a. Mahse hun a lo rei a, an ning leh si a. A rûk in an rel a, hmar lam pan in an chhuak ta vek mai a. Lallula chuan a um a, tam tak a hruai kir a, bawih nghet ah a pachhuak in an awm ta a. Hei chu tlan chhuah theih an ni lo.
Mahse an bawih nih dan hi an nuam sa a. In hran an khawr thei a. Mahse Vawk an talh apiangin Lal hnênah a bawp an pek zel a ngai thung.

FATLUM BAWIH
Lentlang atanga Sailo ho ten Selesih an rawn zuan lai khan Hualngo Muchhip an tih te chu Tiau chhak lamah an awm a. Nakinah chuan Tiau kan a rawn tlak thlak an duh ta a. Lallula fate tlawn nan Luahtalha thi mal leh Hauvawng darbu an pe a. Piler leh Riangtlei ah an awm ta teuh mai a. Sailo lal te chuan an Ram sah en sa a an awm chu an ngai thei lo leh si a. Hualngo lah chuan tam an lo in ti tawk hle ni tur a ni: Lalsavunga khua Zawngtah chu an run ta mai a. Mahse an che tha lo zawk tlat.
Chuta tang chuan Sailo khua a Hualngo awm te pawh chu Piler leh Riangtlei lamah an pem ta zel mai a. Lalsavunga thinrim chuan a unau te a sawm a. Hualngo khua chu a run ta thut mai a. An that teuh a, Sal ah an man teuh bawk a. Hualngo Lal Zahuata pawh a tlanchhia a. Tiau rala a Pa Chemtawnga a han fin ta ngawt a.
Heta an man te hi Sailo Bawih ah an awm ta vek a. Pachhuak Bawih ang bawkin in hrang neiin an awm a. Tlan chhuah theih an ni lo. Vawk an talh apiangin a bawp Lal hnên ah an pe thin.
Sailo Lal fatlum berin a chhawm thin a. Hei vang hian Fatlum Bawih an ti niin a lang.

Bawih kan sawi tak te zawng zawng hi, dan hmanga khap a nih tak avangin an awm tawh lova. History hriat nan ka ziak mai mai a ni.