Aug 6 2015 Tunlai Burma rama tuilian tuartute chhawmdawl nan India sorkar pawhin tanpuina pek a tum mek a. Delhi lama thuneitu chuan Food Corporation of India (FCI)-Shillong ah a tul anga eitur tlachham mipuite mamawh Buhfai pe turin a hriattir tawh a. FCI-Shillong pawhin FCI Godown (Kudam)Tanhril,Aizawl chu Buhfai Quintals 20,000 zet Burma rama thawn lut tura buatsaih turin a hriattir tawh bawk a ni.
.
FCI Manager Pi Zodinpuii Ralte chuan zawhna chhangin, "An e-mail kan dawng tawh a, Buhfai hi 20,000 quintals Burma-a thawn lut turin thlawhna (air-lifting) hman a ni anga; Tanhril atangin Lengpui Airport-ah motor lian truck hmangin phur thlen a ni ang..." a ti. Hetianga relief operation neih anih chuan Burma leh Mizoram inrina dep leh Zo hnahthlakte chenna area Chin State, Burma chuan a tangkaipuiin an manganna a chhawk an beisei. Chin State ah hian Zo chhul chhuak mi 40,000 chuang an cheng.
.
Tuilian vangin mi 66 chuan nunna an chan niin official-ah tarlan a ni a, mihring 210,000 chuang nun phung a tibuai hle a; In 100 chuang tuilianin a chim chhe bawk a ni. Tanpuina hnathawk turin China, Norway, US leh EU ram te pawh an thawk chhuak.
.
Kum 2008 khan Burma hian thlipui (cyclone) Nargis an lo tuar tawh a, khatih laia Sipai (junta) sorkar khan ram dang tanpuina a duh lova, mi 130,000 zetin an thih phah a ni. Tunah erawh November thlaah inthlanpui an nei dawn a; sipaihoten relief works thawkin ramdang tanpuina (International Food Assistance) an dil.
.
President Thein Sein aiawha thupuangtu leh Ministry of Information thupuangtu Ye Htut chuan, "A theih ang angin ram danga donor organizations te kan dawr a. Ram dang tanpuina atangin mipuite awm hmun siam thatna leh ei tur pek an ni ang" a ti.